28 మంది ఎమ్మెల్యేల రహస్య సమావేశం.. విజయ్ దెబ్బకు ఏఐఏడీఎంకే కకావికలం..!
తమిళనాడు అసెంబ్లీ ఎన్నికల్లో నటుడు విజయ్ నేతృత్వంలోని 'తమిళగ వెట్రి కజగం' (TVK) సాధించిన ప్రభంజనం.. రాష్ట్రంలోని ప్రధాన ప్రతిపక్షం ఏఐఏడీఎంకేలో పెను సంక్షోభానికి దారితీసింది.
దిశ, వెబ్డెస్క్: తమిళనాడు అసెంబ్లీ ఎన్నికల్లో నటుడు విజయ్ నేతృత్వంలోని 'తమిళగ వెట్రి కజగం' (TVK) సాధించిన ప్రభంజనం.. రాష్ట్రంలోని ప్రధాన ప్రతిపక్షం ఏఐఏడీఎంకేలో పెను సంక్షోభానికి దారితీసింది. గత పదేళ్లుగా ప్రధాన శక్తిగా ఉన్న ఏఐఏడీఎంకే, తాజాగా మూడో స్థానానికి పడిపోవడంతో ఆ పార్టీ ఎమ్మెల్యేలు, నేతల్లో తీవ్ర అసంతృప్తి వ్యక్తమవుతోంది. పార్టీ ఘోర పరాజయానికి బాధ్యత వహిస్తూ ప్రధాన కార్యదర్శి ఎడప్పాడి కే.పళనిస్వామి (EPS) పదవి నుంచి తప్పుకోవాలని సొంత పార్టీ నేతలే డిమాండ్ చేస్తున్నారు. మొత్తం 234 స్థానాలకు గాను ఏఐఏడీఎంకే కేవలం 47 స్థానాలకే పరిమితం కావడం, జయలలిత మరణం తర్వాత ఇది అత్యంత పేలవమైన ప్రదర్శన కావడంతో నాయకత్వ మార్పు కోరుతూ గళం విప్పుతున్నారు.
విజయ్ పార్టీకి మద్దతు ఇచ్చే యోచనలో ఎమ్మెల్యేలు..
తాజా సమాచారం ప్రకారం.. ఏఐఏడీఎంకే ఎమ్మెల్యేలు రెండు వర్గాలుగా విడిపోయారు. ఒక వర్గం ఎమ్మెల్యేలు విజయ్ నేతృత్వంలోని ప్రభుత్వానికి బయట నుంచి మద్దతు ఇవ్వాలని కోరుతున్నారు. సుమారు 28 మంది ఎమ్మెల్యేలు ఇప్పటికే రహస్యంగా సమావేశమై, టీవీకే ప్రభుత్వానికి మద్దతు తెలపాలని పళనిస్వామిపై ఒత్తిడి తెచ్చినట్లు తెలుస్తోంది. మాజీ మంత్రులు సి.వి.షణ్ముగం, ఎస్.పి.వేలుమణి వంటి కీలక నేతలు పళనిస్వామి నిర్వహించిన సమావేశాలకు గైర్హాజరు కావడం పార్టీలో చీలికను స్పష్టం చేస్తోంది. వీరు విజయ్ పార్టీకి మద్దతు ఇచ్చేందుకు మొగ్గు చూపుతున్నట్లు సమాచారం.
రిసార్ట్ రాజకీయాలు.. పొత్తుల చిచ్చు..
ఎమ్మెల్యేలు చేజారిపోకుండా ఉండేందుకు ఏఐఏడీఎంకే అధిష్ఠానం కొంతమందిని పుదుచ్చేరిలోని ఒక రిసార్ట్కు తరలించినట్లు వార్తలు వచ్చాయి. మరోవైపు, విజయ్ను అడ్డుకునేందుకు అధికార డీఎంకే పార్టీ, ఏఐఏడీఎంకేతో తెరవెనుక చర్చలు జరుపుతోందన్న ప్రచారం కూడా కలకలం రేపింది. అయితే డీఎంకే ఈ వార్తలను ఖండించింది. "పళనిస్వామి స్వచ్ఛందంగా తప్పుకోకపోతే, పార్టీ నుంచి ఎమ్మెల్యేలు భారీగా టీవీకే వైపు వెళ్లే అవకాశం ఉంది" అని రాజకీయ విశ్లేషకులు హెచ్చరిస్తున్నారు. ఇప్పటికే మాజీ నేత కే.సీ. పళనిస్వామి వంటి వారు బహిరంగంగానే నాయకత్వ మార్పును డిమాండ్ చేస్తున్నారు. విజయ్ ముఖ్యమంత్రిగా ప్రమాణ స్వీకారం చేసి సరికొత్త అధ్యాయాన్ని మొదలుపెట్టగా, డీఎంకే, ఏఐఏడీఎంకే వంటి పాత పార్టీలు ఇప్పుడు తమ ఉనికిని కాపాడుకునేందుకు కష్టపడుతున్నాయి.
