మృత్యుధారగా మారిన మధ్యధరా సముద్రం.. 53 మంది వలసదారులు జలసమాధి

దిశ, వెబ్ డెస్క్: జీవితంలో ఎన్నో ఆశలతో వలస మార్గాన్ని ఎంచుకునే అమాయక ప్రజల ప్రాణాలు మధ్యధరా సముద్రం (Mediterranean Sea)లో కలిసిపోతున్నాయి. మెరుగైన భవిష్యత్తు కోసం ఆశతో ఆఫ్రికా తీరం (Coast of Africa) దాటి యూరప్ వెళ్లాలనుకున్న వలసదారుల కలలు మధ్యధరా సముద్రంలోనే ఆవిరవుతున్నాయి. గతంలో ఎంతో మంది ఇలా సముద్రంలో ప్రాణాలు కోల్పోయినప్పటికి.. బతుకుదెరువు కోసం నిత్యం వందలాది మంది తమ ప్రాణాలతో చెలగాటం ఆడుతూ ప్రాణాలు కోల్పోతున్నారు. తాజాగా లిబియా తీరం (Libyan coast)లో జరిగిన ఘోర పడవ ప్రమాదంలో ఇద్దరు పసికందులు సహా 53 మంది ప్రాణాలు కోల్పోయారు. ఈ హృదయవిదారక ఘటనలో కేవలం ఇద్దరు నైజీరియా మహిళలు మాత్రమే ప్రాణాలతో బయటపడగా, వారి కళ్ల ముందే తమ కుటుంబ సభ్యులు సముద్రంలో మునిగిపోయారు.

ఆరు గంటల ప్రయాణం.. అంతులేని శోకం

తాజా పడవ ప్రమాదంపై ఐక్యరాజ్యసమితికి చెందిన అంతర్జాతీయ వలస సంస్థ (IOM) కీలక వివరాలను వెల్లడించింది. ఈ వివరాల ప్రకారం.. సుమారు 55 మంది వలసదారులతో కూడిన రబ్బరు బోటు (Rubber boat) ఫిబ్రవరి 5 గురువారం రాత్రి 11 గంటల సమయంలో లిబియాలోని జావియా (Al-Zawiya) నగరం నుండి బయలుదేరింది. ప్రయాణం మొదలైన ఆరు గంటలకే, సముద్రపు అలల ఉధృతికి బోటులోకి నీరు చేరి జువారా (Zuwara) తీరానికి సమీపంలో బోల్తా పడింది. ప్రాణాలతో బయటపడిన ఇద్దరు మహిళల్లో ఒకరు తన భర్తను కోల్పోగా, మరొకరు తన ఇద్దరు పసిబిడ్డలను కోల్పోయి పుట్టెడు దుఃఖంలో ఉన్నారు. ఈ ప్రమాదంతో మొత్తం 53 మంది ప్రాణాలు (53 people died) కోల్పోయారు.

గత ఏడాది మరణాల మృత్యుఘోష

మధ్యధరా సముద్రం వలసదారులకు (immigrants) ప్రపంచంలోనే అత్యంత ప్రమాదకరమైన మార్గంగా (The most dangerous way) మారింది. ఐక్యరాజ్యసమితి (United Nations) డేటా ప్రకారం గత కొన్ని ఏళ్లలో జరిగిన ప్రమాదాల గణాంకాలు భయం గొల్పుతున్నాయి. 2025లో ఒక్క మధ్యధరా సముద్ర మార్గంలోనే సుమారు 1,342 మంది మరణించారు. ఈ ఏడాది ప్రారంభమైన కేవలం 40 రోజుల్లోనే ఈ తాజా ప్రమాదంతో కలిపి మొత్తం 484 మంది వలసదారులు మృత్యువాత పడ్డారు. గత నవంబర్ (2025)లో జరిగిన మరో ఘటనలో 42 మంది సుడాన్, సోమాలియా వలసదారులు ఇదే ప్రాంతంలో గల్లంతయ్యారు. 2014 నుండి ఇప్పటివరకు మొత్తం 33,000 మందికి పైగా ఈ సముద్ర మార్గంలో ప్రాణాలు కోల్పోవడం గమనార్హం.

మానవ అక్రమ రవాణా కోరల్లో వలసదారులు

యుద్ధం, పేదరికం, ఆకలి నుండి తప్పించుకోవడానికి ఆఫ్రికా దేశాల (African countries) ప్రజలు అక్రమ రవాణాదారులను (Smugglers) ఆశ్రయిస్తున్నారు. పాతపడిపోయిన, గాలి తక్కువగా ఉన్న రబ్బరు బోట్లలో సామర్థ్యానికి మించి జనాన్ని ఎక్కించి ప్రాణాలతో చెలగాటమాడుతున్నారు. లిబియాలో కొనసాగుతున్న అస్థిరతను అడ్డం పెట్టుకుని స్మగ్లింగ్ నెట్‌వర్క్‌లు భారీగా లాభపడుతున్నాయి. ఈ వరుస ప్రమాదాలు అంతర్జాతీయ సమాజానికి ఒక హెచ్చరిక. వలసదారుల కోసం సురక్షితమైన మార్గాలను ఏర్పాటు చేయకపోతే, మధ్యధరా సముద్రం మరిన్ని వేల మందికి సామూహిక సమాధిగా మారుతూనే ఉంటుందని విశ్లేషకులు విమర్శిస్తున్నారు.

రోడ్డుపై విమానం ఎమర్జెన్సీ ల్యాండింగ్.. మూడు కార్లు ధ్వంసం, ఇద్దరికి గాయాలు