‘జనజీవన స్రవంతిలోకి వస్తున్నాను’.. మావోయిస్టు అగ్రనేత పాపారావు ఫస్ట్ రియాక్షన్
దాదాపు నాలుగు దశాబ్దాలుగా ఛత్తీస్గఢ్ అడవులను వణికించిన నక్సల్ సాయుధ పోరాటం ముగింపు దశకు చేరుకుంది.
దిశ, వెబ్డెస్క్: దాదాపు నాలుగు దశాబ్దాలుగా ఛత్తీస్గఢ్ అడవులను వణికించిన నక్సల్ సాయుధ పోరాటం ముగింపు దశకు చేరుకుంది. మావోయిస్టు ఉద్యమంలో అత్యంత కీలక నేతగా పేరుగాంచిన పాపారావు (Papa Rao) తన 17 మంది సహచరులతో కలిసి జనజీవన స్రవంతిలో చేరాలని నిర్ణయించుకున్నారు. ఇది ఛత్తీస్గఢ్ చరిత్రలోనే అతిపెద్ద విజయంగా భద్రతా బలగాలు భావిస్తున్నాయి. తాజాగా లొంగుబాటుపై పాపారావు నేరుగా మీడియా ప్రతినిధులతో మాట్లాడారు. "నేను ఇకపై భారత రాజ్యాంగ పరిధిలో ఉంటూ, ప్రజాస్వామ్య పద్ధతిలో ప్రజల గొంతుకను వినిపిస్తాను. ప్రభుత్వ పునరావాస పథకం కింద ప్రధాన స్రవంతిలోకి వస్తున్నాను" అని ఆయన ధృవీకరించారు. నేషనల్ పార్క్ ఏరియాలో అత్యంత క్రియాశీలంగా ఉన్న పాపారావు బృందం లొంగిపోవడంతో, నక్సల్స్ యొక్క వెన్నెముక విరిగినట్లయింది. నక్సల్స్ రహిత రాష్ట్రంగా మార్చేందుకు ప్రభుత్వం మార్చి 31, 2026ని గడువుగా నిర్ణయించింది. తాజా పరిణామాలతో ఈ గడువు కంటే ముందే ఛత్తీస్గఢ్లో నక్సలిజం పూర్తిగా అంతమయ్యే అవకాశాలు కనిపిస్తున్నాయి.
ఉపముఖ్యమంత్రి ధీమా..
ఛత్తీస్గఢ్ ఉపముఖ్యమంత్రి విజయ్ శర్మ మాట్లాడుతూ.. ఒకప్పుడు రాష్ట్రంలో 30 నక్సల్ ఏరియా కమిటీలు ఉండగా, ఇప్పుడు కేవలం నాలుగు మాత్రమే మిగిలాయని వెల్లడించారు. నక్సలిజం పూర్తిగా అంతమైన తర్వాత కూడా భద్రతా బలగాల మోహరింపు కొనసాగుతుందని, శాంతిభద్రతల విషయంలో రాజీ పడబోమని ఆయన స్పష్టం చేశారు.
