సక్కమ్మ సారక్క స్పెషల్ : ఎదురుకోళ్లు.. మొక్కు
సాధారణంగా జాతరలో కోళ్లను, మేకలను బలి ఇవ్వడం చూస్తుంటాం. కానీ మేడారంలో ‘ఎదురుకోళ్లు’ అనేది ఒక ప్రత్యేకమైన మొక్కు.
సాధారణంగా జాతరలో కోళ్లను, మేకలను బలి ఇవ్వడం చూస్తుంటాం. కానీ మేడారంలో ‘ఎదురుకోళ్లు’ అనేది ఒక ప్రత్యేకమైన మొక్కు. దేవతలు గద్దెలపైకి వచ్చే సమయంలో, భక్తులు తమ మొక్కుల ప్రకారం కోళ్లను లేదా గొర్రెలను గాలిలోకి విసిరేయడాన్ని ‘ఎదురుకోలు’ అంటారు. సమ్మక్క, సారలమ్మలు అడవి నుంచి గ్రామానికి వస్తున్నప్పుడు వారికి స్వాగతం పలుకుతూ, తమ ఇష్టదైవాలకు ఇష్టమైన నైవేద్యాన్ని సమర్పిస్తున్నామని భక్తుల నమ్మకం. అమ్మవారు వస్తున్నప్పుడు భక్తులు కోడిని గాలిలోకి విసురుతారు. ఒకవేళ ఆ విసిరిన కోడి గాలిలో రెక్కలు ఆడిస్తూ అమ్మవారిని తీసుకువచ్చే పూజారికి తగిలితే, ఆ భక్తుడిపై అమ్మవారి కరుణ పరిపూర్ణంగా ఉందని, వారి కోరికలు వెంటనే నెరవేరుతాయని ఒక గట్టి నమ్మకం. దేవతలను గద్దెలపైకి తీసుకువచ్చే ‘పూజారులు’ (వడ్డెలు) మార్గమధ్యలో వస్తుండగా, భక్తులు భక్తిపారవశ్యంతో ఊగిపోతూ ఈ ఎదురుకోళ్లు ఇస్తారు. ఇది వారి పోరాట పటిమకు, వీరత్వానికి ఇచ్చే గౌరవంగా భావిస్తారు.
ముహూర్తాన్ని నిర్ణయించేది కోళ్లే..
పూర్వం మేడారం జాతర తేదీలను నిర్ణయించేటప్పుడు, పూజారులు ఒక తెల్లటి కోడి పుంజును ఉపయోగించేవారు. ఆ పుంజు వేసే అడుగులు, అది చేసే శబ్దాన్ని బట్టి అమ్మవారికి ఇష్టమైన రోజును గుర్తించేవారని పెద్దలు చెబుతారు. జాతర సమయంలో దేవతలు అడవి నుంచి గద్దెలకు వస్తున్నప్పుడు, దుష్ట శక్తులు అడ్డుకోకుండా ఉండటానికి కోడి పుంజుల రక్తాన్ని సరిహద్దుల్లో చల్లుతారు. దీన్ని ఒక రక్షణ కవచంగా భావిస్తారు.
