సంగీత ప్రియులకు షాక్.. ప్రపంచవ్యాప్తంగా MTV మ్యూజిక్ ఛానెల్స్ శాశ్వతంగా మూత

దిశ, డైనమిక్ బ్యూరో: ప్రపంచ వ్యాప్తంగా కోట్లాది సంగీతాభిమానులకు నాలుగు దశాబ్దాలుగా వినోదం పంచిన MTV మ్యూజిక్ ఛానెల్స్‌కు తెరపడింది. పారామౌంట్ గ్లోబల్ ఆధ్వర్యంలోని MTV, డిసెంబర్ 31న తమ అనుబంధ 24 గంటల సంగీత ఛానెల్స్‌ను శాశ్వతంగా మూసివేసింది. దీంతో మ్యూజిక్ టెలివిజన్ చరిత్రలో ఒక కీలక అధ్యాయం ముగిసినట్లైంది.

చివరి వీడియోగా ప్రసారం చేస్తూ..

1981 ఆగస్టు 1న MTV ప్రారంభమైన సందర్భంగా ప్రసారమైన తొలి మ్యూజిక్ వీడియో.. బగుల్స్ (The Buggles) బృందం పాడిన ‘వీడియో కిల్డ్ ది రేడియో స్టార్’ అనే చివరి వీడియోగా ప్రసారం చేస్తూ MTV భావోద్వేగ వీడ్కోలు పలికింది. న్యూ ఇయర్ ఈవ్ రోజున ఈ చారిత్రక క్షణం ప్రసారమవడంతో అభిమానులు భావోద్వేగంలో మునిగిపోయారు. ఈ ఏడాది ప్రారంభంలోనే 2025 నుంచి 24/7 మ్యూజిక్ ఛానెల్స్‌ను నిలిపివేయనున్నట్లు MTV ప్రకటించింది. దానికి అనుగుణంగా యునైటెడ్ కింగ్‌డమ్‌లో MTV Music, MTV 80s, MTV 90s, Club MTV, MTV Live వంటి ప్రముఖ ఛానెల్స్ పూర్తిగా ఆఫ్‌ఎయిర్ అయ్యాయి. MTV 90s ఛానెల్ చివరి వీడియోగా స్పైస్ గర్ల్స్‌ ప్రసిద్ధ గీతం ‘గుడ్‌బై’ను ప్రసారం చేయడం ప్రత్యేకంగా ఆకట్టుకుంది. ప్రస్తుతం ఈ ఛానెల్స్‌ను ట్యూన్ చేసిన వీక్షకులకు ఛానెల్ లోగోలు మాత్రమే మారుతూ కనిపిస్తూ, MTV కంటెంట్‌ను MTV HDలో వీక్షించవచ్చని సూచనలు వస్తున్నాయి. అయితే అమెరికాలో MTV భవిష్యత్తుపై మాత్రం MTV గానీ, దాని మాతృ సంస్థ పారమౌంట్-స్కైడాన్స్ గానీ ఇప్పటివరకు అధికారిక ప్రకటన చేయలేదు.

1981లో ప్రారంభమైన MTV..

1981లో అమెరికాలో ప్రారంభమైన MTV, 1987లో యునైటెడ్ కింగ్‌డమ్, ఐర్లాండ్‌లలో అడుగుపెట్టింది. కాలక్రమేణా అమెరికాలో సంగీత వీడియోల స్థానాన్ని రియాలిటీ షోలు ఆక్రమించడంతో MTV స్వరూపం మారింది. పారమౌంట్ సీఈఓ డేవిడ్ ఎలిసన్, MTVతో పాటు సంస్థకు చెందిన ఇతర కేబుల్ ఛానెల్స్‌ను పునరుజ్జీవింపజేయాలనే యోచనలో ఉన్నట్లు తెలిపారు. అయితే దానికి సంబంధించిన వివరాలు వెల్లడించలేదు. స్కైడాన్స్‌తో విలీనానికి అనుబంధంగా చేపట్టిన వ్యయ నియంత్రణ చర్యల్లో భాగంగా MTV యూరప్ మ్యూజిక్ అవార్డ్స్, MTV లాటిన్ అమెరికా MIAW అవార్డ్స్ వంటి పలు అవార్డు కార్యక్రమాలను కూడా రద్దు చేసింది.

అభిమానులు షాక్‌

అదేవిధంగా ఆస్ట్రేలియా, పోలాండ్, ఫ్రాన్స్, బ్రెజిల్ వంటి దేశాల్లోనూ సంగీతానికి మాత్రమే అంకితమైన MTV ఛానెల్స్‌ను మూసివేయనున్నట్లు సమాచారం. ఇలా ఒక తరం సంగీతాభిమానుల జ్ఞాపకాల్లో చెరగని ముద్ర వేసిన MTV మ్యూజిక్ ఛానెల్స్‌కు శాశ్వతంగా తెరపడంతో అభిమానులు షాక్‌ గురయ్యారు. అభిమానుల ట్వీట్..

Read More..

ప్రభాస్ చేసిన పనికి సెట్‌లో కంట్రోల్‌లో ఉండలేకపోయాను.. నిధి అగర్వాల్ షాకింగ్ కామెంట్స్