సీఈసీ జ్ఞానేశ్ కుమార్‌ను తొలగించాలని విపక్షాల పట్టు.. పార్లమెంట్‌లో తీర్మానం దిశగా అడుగులు!

దిశ, వెబ్‌డెస్క్: భారత ఎన్నికల సంఘం (CEC) నిష్పాక్షికతపై గత కొంతకాలంగా విమర్శలు గుప్పిస్తున్న విపక్షాలు, ఇప్పుడు ఏకంగా చీఫ్ ఎలక్షన్ ఆఫీసర్ (CEC) జ్ఞానేష్ కుమార్‌ను పదవి నుంచి తొలగించాలని డిమాండ్ చేస్తున్నాయి. ఈ మేరకు పార్లమెంట్‌లో తొలగింపు తీర్మానాన్ని (Impeachment Motion) ప్రవేశపెట్టేందుకు 'ఇండియా' (INDIA) కూటమి పార్టీలు సిద్ధమయ్యాయి. ఎన్నికల నిర్వహణలో పారదర్శకత లోపించిందని, అధికార పక్షానికి అనుకూలంగా కమిషన్ వ్యవహరిస్తోందని విపక్షాలు ప్రధానంగా ఆరోపిస్తున్నాయి. బిహార్ వంటి రాష్ట్రాల్లో సుమారు 65 లక్షల మంది ఓటర్ల పేర్లను జాబితా నుండి తొలగించడంపై సుప్రీంకోర్టు జోక్యం చేసుకోవడం ఈ వివాదానికి ఆజ్యం పోసింది. ఎన్నికల కమిషనర్ బీజేపీ ప్రతినిధిలా వ్యవహరిస్తున్నారని ఆర్‌జేడీ (RJD) వంటి పార్టీలు తీవ్ర విమర్శలు చేశాయి.

అంత ఈజీ కాదు..

ఇదిలా ఉంటే.. భారత రాజ్యాంగంలోని ఆర్టికల్ 324(5) ప్రకారం, చీఫ్ ఎన్నికల కమిషనర్‌ను సాదాసీదాగా తొలగించడం సాధ్యం కాదు. సుప్రీంకోర్టు న్యాయమూర్తిని ఏ విధంగానైతే తొలగిస్తారో, సీఈసీని కూడా అదే ప్రక్రియ ద్వారా తొలగించాలి. లోక్‌సభ మరియు రాజ్యసభల్లో ప్రత్యేక మెజారిటీ (2/3 వంతు సభ్యుల మద్దతు)తో తీర్మానం నెగ్గాల్సి ఉంటుంది. ఈ తీర్మానాన్ని ప్రవేశపెట్టాలంటే కనీసం 50 మంది సభ్యులు సంతకాలు చేసి నోటీసు ఇవ్వాల్సి ఉంటుంది. ప్రస్తుత పార్లమెంట్‌లో సంఖ్యాబలం దృష్ట్యా ఈ తీర్మానం నెగ్గడం కష్టమని తెలిసినప్పటికీ, ప్రభుత్వ వైఫల్యాలను మరియు ఎన్నికల సంఘం తీరును ప్రజల్లోకి తీసుకెళ్లడమే లక్ష్యంగా విపక్షాలు ఈ వ్యూహాన్ని రచిస్తున్నట్లు విశ్లేషకులు భావిస్తున్నారు. ఒకవేళ ఈ తీర్మానం ప్రవేశపెడితే, భారత ప్రజాస్వామ్య చరిత్రలో ఇది ఒక కీలక ఘట్టంగా నిలవనుంది.

పార్లమెంట్‌ సమావేశాలు ప్రారంభం.. నేడు స్పీకర్‌ ఓం బిర్లాపై అవిశ్వాస తీర్మానం!