ఒడిశాలో భారీ ఎన్‌కౌంటర్.. మావోయిస్టు అగ్రనేత గణేష్ ఉయికే హతం

దిశ, వెబ్ డెస్క్: ఒడిశాలోని కంధమాల్ జిల్లాలో గత 48 గంటలుగా సాగుతున్న భారీ యాంటీ నక్సల్ ఆపరేషన్‌లో మావోయిస్టు పార్టీకి పెను దెబ్బ తగిలింది. ఈ ఎన్‌కౌంటర్లలో మావోయిస్టు కేంద్ర కమిటీ సభ్యుడు (CC Member), ఒడిశా ఇన్-ఛార్జ్ గణేష్ ఉయికే (69) సహా మొత్తం ఐదుగురు మావోయిస్టులు ప్రాణాలు కోల్పోయారు. గురువారం ఉదయం చాకాపాడ్ పోలీస్ స్టేషన్ పరిధిలోని రాంపా అటవీ ప్రాంతంలో ఎస్ఓజీ (SOG), సీఆర్‌పీఎఫ్ (CRPF) బలగాలు సంయుక్తంగా నిర్వహించిన గాలింపు చర్యల్లో ఈ ఎన్ కౌంటర్ జరిగింది. ఈ పోరులో గణేష్ ఉయికేతో పాటు ఇద్దరు మహిళా మావోయిస్టులు సహా మొత్తం నలుగురి మృతదేహాలను పోలీసులు స్వాధీనం చేసుకున్నారు. గణేష్ ఉయికేపై ప్రభుత్వం రూ. 1.1 కోట్ల భారీ రివార్డు ప్రకటించడం ఆయన ప్రాముఖ్యతను చాటుతోంది.

కీలక నేతల హతం - ఆయుధాల స్వాధీనం

తెలంగాణలోని నల్గొండ జిల్లా చండూరు మండలానికి చెందిన గణేష్ ఉయికే (అలియాస్ పాకా హనుమంతు) దశాబ్దాలుగా మావోయిస్టు ఉద్యమంలో కీలక పాత్ర పోషిస్తున్నారు. ఛత్తీస్‌గఢ్, ఒడిశా సరిహద్దుల్లో కార్యకలాపాలను పర్యవేక్షిస్తున్న ఆయన మృతి, ఆ పార్టీకి తీరని లోటుగా భావిస్తున్నారు. ఈ ఎన్‌కౌంటర్ జరిగిన ప్రాంతం నుండి భద్రతా బలగాలు రెండు ఇన్సాస్ (INSAS) రైఫిళ్లు, ఒక 303 రైఫిల్‌ను స్వాధీనం చేసుకున్నాయి. అంతకుముందు బుధవారం రాత్రి కూడా గుమ్మా అటవీ ప్రాంతంలో జరిగిన ఎదురుకాల్పుల్లో బారి అలియాస్ రాకేష్ (ACM), అమృత్ అనే ఇద్దరు మావోయిస్టులు హతమయ్యారు. వీరిద్దరిపై రూ. 23.65 లక్షల రివార్డు ఉంది.

ఈ ఆపరేషన్‌ను ఒడిశా పోలీస్ డీఐజీ (ఆపరేషన్స్) అఖిలేశ్వర్ సింగ్ మరియు కంధమాల్ ఎస్పీ ప్రత్యక్షంగా పర్యవేక్షిస్తున్నారు. సుమారు 23 బృందాలు (SOG, CRPF, BSF) ప్రస్తుతం కంధమాల్, గంజం సరిహద్దు అడవులను జల్లెడ పడుతున్నాయి. కేవలం రెండు రోజుల క్రితమే 22 మంది మావోయిస్టులు డీజీపీ ముందు లొంగిపోయిన నేపథ్యంలో, ఈ వరుస ఎన్‌కౌంటర్లు మావోయిస్టు శ్రేణులను పూర్తిగా బలహీనపరిచాయి. 2026 మార్చి నాటికి దేశాన్ని నక్సల్స్ రహితంగా మార్చాలనే కేంద్ర ప్రభుత్వ లక్ష్యంలో భాగంగా ఈ దాడులు కొనసాగుతున్నాయని అధికారులు స్పష్టం చేశారు.

Read More..

రెండు ఎన్కౌంటర్లు.. ఐదుగురు మావోయిస్టులు మృతి