Toxic Movie : పుకార్లకు చెక్ పెట్టిన యష్.. ‘టాక్సిక్’ అలాంటి కథ కాదంటూ ఆసక్తికర కామెంట్స్

దిశ, సినిమా: కన్నడ రాకింగ్ స్టార్ యష్ ప్రస్తుతం వరుసగా భారీ బడ్జెట్ సినిమాలతో పాన్ ఇండియా బాక్సాఫీస్‌ను షేక్ చేసేందుకు సిద్ధమవుతున్నారు. ఒకవైపు నితీష్ తివారీ దర్శకత్వంలో ‘రామాయణ’ వంటి పౌరాణిక చిత్రంలో నటిస్తూనే, మరోవైపు గీతూ మోహన్ దాస్ దర్శకత్వంలో ‘టాక్సిక్’ అనే భారీ యాక్షన్ మూవీలో నటిస్తున్నారు. ఈ సినిమా గురించి గత కొన్ని రోజులుగా సోషల్ మీడియాలో రకరకాల పుకార్లు వస్తున్న నేపథ్యంలో, యష్ తాజాగా వీటన్నింటికీ ఫుల్ క్లారిటీ ఇచ్చారు. ‘టాక్సిక్’ అంటే ఒక గ్యాంగ్‌స్టర్ డ్రామా అని అందరూ అనుకుంటున్నారు, కానీ అది నిజం కాదని యష్ స్పష్టం చేశారు. "నేను మళ్ళీ మళ్ళీ చెబుతున్నాను.. ఇది గ్యాంగ్‌స్టర్ సినిమా కాదు. ఇది చాలా భిన్నమైన ప్రపంచం మరియు సరికొత్త కథాంశంతో రూపొందుతున్న మూవీ. గీతూ మోహన్ దాస్ ఈ సినిమాను తనదైన విజన్‌తో అద్భుతంగా తెరకెక్కిస్తున్నారు" అని యష్ వెల్లడించారు. ఇందులో కేవలం యాక్షన్ మాత్రమే కాకుండా, ప్రేక్షకులను కట్టిపడేసే బలమైన భావోద్వేగాలు కూడా ఉంటాయని ఆయన హామీ ఇచ్చారు. ఈ సినిమాకు సంబంధించి మరో క్రేజీ అప్‌డేట్‌ను కూడా యష్ పంచుకున్నారు.

‘టాక్సిక్’ చిత్రాన్ని మొదటిసారిగా ఇంగ్లీష్ భాషలో కూడా తెరకెక్కిస్తున్నట్లు ఆయన తెలిపారు. గ్లోబల్ ఆడియన్స్‌ను దృష్టిలో ఉంచుకుని అత్యున్నత సాంకేతిక ప్రమాణాలతో, అద్భుతమైన విజువల్స్‌తో ఈ సినిమా రాబోతోంది. తన అభిమానులు తన నుంచి ఎలాంటి మాస్ అండ్ క్లాస్ ఎలిమెంట్స్ ఆశిస్తున్నారో తనకు తెలుసని, అందుకే ప్రతి చిన్న విషయంలోనూ టీమ్ అంతా జాగ్రత్తలు తీసుకుంటున్నట్లు యష్ చెప్పారు. సినిమా వాయిదా పడబోతోందన్న వార్తలకు యష్ ఘాటుగానే బదులిచ్చారు. ఉగాదికి రావాల్సిన ఈ మూవీ పలు కారణాల వల్ల జూన్ 4కి వాయిదా పడిన మాట వాస్తవమే అని, కానీ ఇకపై వెనక్కి తగ్గే ప్రసక్తే లేదని స్పష్టం చేశారు. అనుకున్న తేదీ జూన్ 4నే సినిమా థియేటర్లలోకి వస్తుందని ఆయన తేల్చి చెప్పారు. కాగా.. ఈ సినిమాలో యష్ సరసన కియారా అద్వానీ హీరోయిన్‌గా నటిస్తుండగా, రుక్మిణి వసంత్, తారా సుతారియా కీలక పాత్రల్లో కనిపిస్తున్నారు. భారీ అంచనాలతో రూపొందుతున్న ఈ చిత్రం బాక్సాఫీస్ వద్ద ఎలాంటి ప్రభంజనం సృష్టిస్తుందో చూడాలి. ప్రస్తుతం యష్ మాట్లాడిన ఈ వీడియోలు నెట్టింట తెగ వైరల్ అవుతున్నాయి.

వారణాసి సాధువులపై ఆర్య వివాదాస్పద వ్యాఖ్యలు.. బాయ్‌కాట్ చేయాలంటూ హిందూ సంఘాలు ఫైర్