విజయ్ అసలు పెళ్లి చేసుకోవద్దని అనుకున్నాడు.. షాకింగ్ విషయాలు చెప్పిన మేనమామ
ప్రస్తుతం సినీ పరిశ్రమలో ఏదో ఒక సెలబ్రిటీ కుటుంబంలో గొడవలు జరగడం, విడిపోవడం చూస్తున్నాం. ఆ భయం మాలో కూడా ఉంది.
దిశ, సినిమా: టాలీవుడ్ సెన్సేషనల్ కపుల్ విజయ్ దేవరకొండ -రష్మిక మందన్నల వివాహం గురించి గత కొద్దిరోజులుగా వస్తున్న వార్తలు ఇప్పుడు నిజమయ్యాయి. వీరిద్దరూ పెళ్లి బంధంతో ఒక్కటైన వేళ, విజయ్ దేవరకొండ మేనమామ, ప్రముఖ నిర్మాత యష్ రంగినేని తాజా ఇంటర్వ్యూలో షాకింగ్ విషయాలను వెల్లడించారు. విజయ్ వ్యక్తిత్వంలో వచ్చిన మార్పులు, వారిద్దరి మధ్య ఉన్న అనుబంధం గురించి యష్ రంగినేని మాట్లాడుతూ.. ‘‘ఒకప్పుడు విజయ్ ఆలోచనలు వేరేలా ఉండేవి. అసలు పెళ్లి అవసరమా? కెరీర్ మీద దృష్టి పెట్టకుండా ఈ బంధాలు ఏంటి? అని వాదించేవాడు. కానీ రష్మిక తన జీవితంలోకి వచ్చాక విజయ్ ఆలోచనా విధానమే పూర్తిగా మారిపోయింది. రష్మిక పరిచయం అతడిని ఒక బాధ్యత గల వ్యక్తిగా మార్చింది. ఇప్పుడు వాళ్లిద్దరినీ జంటగా చూస్తుంటే ముచ్చటగా అనిపిస్తోంది.
విరోష్ పెళ్లి పట్ల మా కుటుంబం అంతా చాలా సంతోషంగా ఉన్నాం’’ అని తెలిపారు. విజయ్, రష్మిక తాము ప్రేమలో ఉన్నామని ఇంట్లో చెప్పినప్పుడు అందరూ కాస్త కంగారు పడ్డారట. దానికి గల కారణాన్ని వివరిస్తూ.. ‘‘ప్రస్తుతం సినీ పరిశ్రమలో ఏదో ఒక సెలబ్రిటీ కుటుంబంలో గొడవలు జరగడం, విడిపోవడం చూస్తున్నాం. ఆ భయం మాలో కూడా ఉంది. వీరిద్దరి బంధం కూడా రేపు ఎలా ఉంటుందో అని అందరం భయపడ్డాం. కానీ వాళ్లిద్దరి మధ్య ఉన్న అండర్స్టాండింగ్, ఒకరిపై ఒకరికి ఉన్న గౌరవం చూశాక మా భయాలన్నీ పోయాయి. వారి మధ్య చాలా మంచి అనుబంధం ఉంది’’ అని రంగినేని చెప్పుకొచ్చారు. ప్రస్తుతానికి ఈ జంట చాలా సంతోషంగా ఉన్నారని, అయితే భవిష్యత్తు గురించి ఎవరూ ఊహించలేరని ఆయన అన్నారు. ‘‘ఇద్దరూ జంటగా చాలా హ్యాపీగా ఉన్నారు. కానీ తలరాత ఎలా ఉంటుందో మనం చెప్పలేం. ఏదేమైనా ఆ దేవుడి దయ వల్ల వీరిద్దరూ జీవితాంతం ఇలాగే కలిసి మెలిసి, సంతోషంగా ఉండాలన్నదే మా అందరి కోరిక’’ అంటూ ఆయన ఆశీర్వదించారు. విజయ్ మేనమామ చేసిన ఈ వ్యాఖ్యలు ఇప్పుడు సోషల్ మీడియాలో విపరీతంగా వైరల్ అవుతున్నాయి.
