‘వైభవ్‌ను చూస్తే నిజంగా భయమేస్తోంది’.. న్యూజిలాండ్ స్టార్ జేమీసన్ ఓపెన్ స్టేట్‌మెంట్

దిశ, వెబ్‌డెస్క్: ఐపీఎల్ 2026 సీజన్‌లో యువ సంచలనం వైభవ్ సూర్యవంశీ తన మెరుపు బ్యాటింగ్‌తో దిగ్గజ బౌలర్లనే భయపెడుతున్నాడు. తాజాగా న్యూజిలాండ్ స్టార్ పేసర్, ఐపీఎల్‌లో సీనియర్ బౌలర్ అయిన కైల్ జేమీసన్.. వైభవ్‌తో జరిగిన పోరుపై ఆసక్తికర వ్యాఖ్యలు చేశాడు. తాను తన కెరీర్‌లో ఇంతలా ఎప్పుడూ భయపడలేదని జేమీసన్ ఓపెన్ అయ్యాడు. జేమీసన్ మాట్లాడుతూ.. "నేను నా లైఫ్‌లో చాలా మంది వరల్డ్ క్లాస్ బ్యాటర్లకు బౌలింగ్ చేశాను. కానీ, వైభవ్ సూర్యవంశీని చూస్తుంటే భయం కలిగింది. ఆ కుర్రాడికి కేవలం 14-15 ఏళ్లే ఉండొచ్చు, కానీ అతని షాట్లు ఆడుతున్న తీరు అమోఘం. ముఖ్యంగా నా బౌలింగ్‌లో అతను ఆడిన తీరు చూసి, బౌలింగ్ చేయడానికి కూడా నేను ఒక క్షణం జంకాను. ఎప్పుడూ ఇంతటి భయాన్ని నేను ఫీల్ అవ్వలేదు" అని వ్యాఖ్యానించాడు.

వైభవ్ సూర్యవంశీ - ఐపీఎల్ సెన్సేషన్..

బిహార్‌కు చెందిన వైభవ్ సూర్యవంశీ చాలా చిన్న వయసులోనే ఐపీఎల్ బరిలోకి దిగి అందరి దృష్టిని ఆకర్షించిన విషయం తెలిసిందే. గంటకు 140-150 కిలోమీటర్ల వేగంతో వచ్చే బంతులను కూడా వైభవ్ ఎంతో అలవోకగా సిక్సర్లుగా మలుస్తున్నాడు. అత్యంత పిన్న వయసులో ఐపీఎల్ ఆడుతున్న ఆటగాడిగా రికార్డు సృష్టించడమే కాకుండా, తన ఆటతో స్టార్ ప్లేయర్ల ప్రశంసలు అందుకుంటున్నాడు. సాధారణంగా 6 అడుగుల 8 అంగుళాల పొడవు ఉండే కైల్ జేమీసన్ బౌన్స్‌ను ఎదుర్కోవడం బ్యాటర్లకు కష్టంగా ఉంటుంది. కానీ వైభవ్ మాత్రం జేమీసన్ వేసిన షార్ట్ పిచ్ బంతులను కూడా ఏమాత్రం తడబడకుండా స్టాండ్స్‌లోకి పంపాడు. ఇదే జేమీసన్‌ను విస్మయానికి గురిచేసింది. ప్రస్తుతం జేమీసన్ చేసిన ఈ వ్యాఖ్యలు సోషల్ మీడియాలో వైరల్ అవుతున్నాయి. "ఒక సీనియర్ బౌలర్ నోట ఇలాంటి మాటలు రావడం చూస్తుంటే వైభవ్ భవిష్యత్తులో భారత క్రికెట్‌కు పెద్ద ఆస్తి కాబోతున్నాడని అర్థమవుతోంది" అని నెటిజన్లు కామెంట్ చేస్తున్నారు.

జేమీసన్‌ 'అతి'కి ఓ డీమెరిట్ పాయింట్‌