జేమీసన్‌ 'అతి'కి ఓ డీమెరిట్ పాయింట్‌

దిశ, వెబ్ డెస్క్ : జైపూర్‌లోని సవాయ్ మాన్ సింగ్ స్టేడియం వేదికగా మే 1న రాజస్థాన్ రాయల్స్(RR), ఢిల్లీ క్యాపిటల్స్(DC) మధ్య జరిగిన మ్యాచ్‌లో వివాదాస్పదమైన ఘటన చోటుచేసుకుంది. ఢిల్లీ పేసర్ కైల్ జేమీసన్ వేసిన అద్భుతమైన యార్కర్‌కు రాజస్థాన్ రాయల్స్ యువ సంచలనం, 15 ఏళ్ల వైభవ్ సూర్యవంశీ క్లీన్ బౌల్డ్ అయ్యాడు. అయితే, వికెట్ తీసిన ఆనందంలో జేమీసన్ ప్రదర్శించిన అతి ప్రవర్తన(Intimidating Send-off) ఇప్పుడు క్రీడా వర్గాల్లో చర్చనీయాంశమైంది. యువ బ్యాటర్ వైభవ్ దగ్గరకు వెళ్లి అగ్రెసివ్‌గా చప్పట్లు కొడుతూ, తీక్షణమైన చూపులతో గొడవకు దిగుతున్నట్లుగా రియాక్షన్ ఇవ్వడం సోషల్ మీడియాలో వైరల్ అయ్యింది.

ఈ ఘటనను తీవ్రంగా పరిగణించిన ఐపీఎల్ మ్యాచ్ రిఫరీ రాజీవ్ సేత్, కైల్ జేమీసన్‌పై క్రమశిక్షణ చర్యలు తీసుకున్నారు. ఐపీఎల్ ప్రవర్తనా నియమావళిలోని ఆర్టికల్ 2.5 కింద దీనిని 'లెవెల్ 1' నేరంగా పరిగణించి, అతనికి ఒక డీమెరిట్ పాయింట్‌తో పాటు అధికారిక హెచ్చరికను జారీ చేశారు. జేమీసన్ తన తప్పును అంగీకరించడంతో విచారణ లేకుండానే ఈ శిక్షను ఖరారు చేశారు. మైదానంలో ఆటగాళ్ల మధ్య భావోద్వేగాలు సహజమే అయినప్పటికీ, కేవలం 15 ఏళ్ల వయస్సున్న ఒక వర్ధమాన ఆటగాడి పట్ల అంతటి కఠినమైన ప్రవర్తన సరికాదని బిసిసిఐ (BCCI) ఈ చర్య ద్వారా స్పష్టమైన సందేశాన్ని పంపింది.

ఈ అంశంపై క్రికెట్ అభిమానులు రెండు వర్గాలుగా చీలిపోయారు. కొంతమంది జేమీసన్ అగ్రెసివ్‌నెస్ గేమ్‌లో భాగమేనని సమర్థిస్తుండగా, మెజారిటీ అభిమానులు మాత్రం అంత చిన్న వయసున్న ఆటగాడిపై అంతటి ఒత్తిడి తీసుకురావడం క్రీడా స్ఫూర్తికి విరుద్ధమని విమర్శిస్తున్నారు. ముఖ్యంగా వైభవ్ వంటి యువ ప్రతిభను ప్రోత్సహించాల్సిన సమయంలో ఇటువంటి ఇంటిమిడేటింగ్ బిహేవియర్ వారి ఆత్మవిశ్వాసాన్ని దెబ్బతీస్తుందని విశ్లేషకులు అభిప్రాయపడుతున్నారు. ఈ వివాదం ఐపీఎల్‌లో ప్లేయర్స్ సెండ్-ఆఫ్‌ల పరిమితులపై మరోసారి కొత్త చర్చకు తెరలేపింది.

‘వైభవ్‌ను చూస్తే నిజంగా భయమేస్తోంది’.. న్యూజిలాండ్ స్టార్ జేమీసన్ ఓపెన్ స్టేట్‌మెంట్