లగాన్..దంగల్ సూపర్ హిట్ చిత్రాల ఫార్ములాను ఫాలో అవుతున్న బుచ్చిబాబు
ఎమోషన్ సరిగ్గా వర్కౌట్ అయితే 'పెద్ది' పెద్ద హిట్ అయినట్లే.
దిశ, వెబ్ డెస్క్: మన ఇండియా సినిమా లవర్స్ స్పోర్ట్స్ బ్యాక్డ్రాప్లో వచ్చే చిత్రాలను ఎక్కువగా ఆదరిస్తూ ఉంటారు. ఈ జానర్ చిత్రాల్లో ఎమోషన్ కాస్త వర్కౌట్ అయితే చాలు, అవి బాక్స్ ఆఫీస్ వద్ద కలెక్షన్ల వర్షం కురిపించిన సందర్భాలు ఎన్నో ఉన్నాయి. ముఖ్యంగా కొన్ని సంవత్సరాల క్రితం వచ్చిన లగాన్ చిత్రం ఈ విషయాన్ని మరోసారి నిరూపించింది. క్రికెట్ క్రీడా నేపథ్యంలో రూపొందిన ఈ సినిమాలో బ్రిటిష్ అధికారులకు మరియు భారతదేశంలోని ఒక చిన్న గ్రామ ప్రజలకు మధ్య జరిగే క్రికెట్ మ్యాచ్ కథాంశంగా ఉంటుంది. అప్పట్లో ఈ మూవీ భారీ సంచలనాన్ని సృష్టించింది.
అలాగే కుస్తీ నేపథ్యంలో రూపొందిన దంగల్ చిత్రం కూడా ఇండియన్ సినిమా చరిత్రలో ప్రత్యేక స్థానం సంపాదించింది. ఈ మూవీ ప్రపంచవ్యాప్తంగా దాదాపు 2000 కోట్లకు పైగా వసూళ్లు సాధించి ఇండియన్ సినిమాల్లో బిగ్గెస్ట్ హిట్లలో ఒకటిగా నిలిచింది. ఇప్పటికీ ఈ చిత్రం అత్యధిక వసూళ్లు సాధించిన ఇండియన్ చిత్రాల్లో ముందువరుసలో కొనసాగుతోంది. ఈ రెండు సినిమాలు మాత్రమే కాకుండా, స్పోర్ట్స్ బ్యాక్డ్రాప్లో రూపొందిన అనేక భారతీయ సినిమాలు భారీ విజయాలను అందుకున్నాయి. ఇదే తరహాలో ప్రస్తుతం మెగా పవర్ స్టార్ రామ్ చరణ్ హీరోగా దర్శకుడు బుచ్చిబాబు సనా తెరకెక్కిస్తున్న పెద్ది చిత్రం కూడా క్రీడా నేపథ్యంలో రూపొందుతోంది.
ఈ సినిమాలో కేవలం ఒక ఆట మాత్రమే కాకుండా, పలు క్రీడలను చూపించనున్నట్లు సమాచారం. ఇప్పటివరకు విడుదల చేసిన ప్రచార చిత్రాలను బట్టి చూస్తే ఇందులో క్రికెట్, కుస్తీ పోటీలు ఉన్నట్లు తెలుస్తోంది. ఇంకా మరికొన్ని క్రీడలు కూడా ఇందులో ఉండనున్నట్లు, వాటి వివరాలను రాబోయే రోజుల్లో వెల్లడించే అవకాశాలు ఉన్నాయని తెలుస్తోంది. ఇలా అనేక క్రీడలను ఒకే చిత్రంలో సమన్వయం చేస్తూ తెరకెక్కిన సినిమాలు ఇప్పటివరకు తెలుగులో మాత్రమే కాకుండా, భారతీయ సినిమాల్లో కూడా చాలా అరుదుగా కనిపించాయి. ఈ సినిమాలో ఎమోషన్ సరైన విధంగా వర్కౌట్ అయితే, పెద్ది చిత్రం భారీ విజయాన్ని అందుకునే అవకాశాలు ఉన్నాయని ట్రేడ్ వర్గాలు అంచనా వేస్తున్నాయి.
