బాలుడిని మింగిన ప్రహరీ గోడ

దిశ, దుగ్గొండి: క్షణకాలం ఏమరుపాటు ఓ తల్లిదండ్రులకు విషాదాన్ని మిగిల్చింది. క్షణాల వ్యవధిలో బాలుడు విగతజీవిగా మారిన ఘటన మండలంలోని స్వామిరావుపల్లి గ్రామంలో చోటుచేసుకుంది. వివరాల్లోకి వెళితే… ఆదివారం పాఠశాలకు సెలవు దినం కావడంతో జమలాపురం మమత-శ్రీనివాస్ దంపతుల కుమారుడు సన్నీ(11) సీతా ఫలాల కొరకు జమలాపురం చిన్న సాంబయ్య ఇంటివద్ద ఉన్న ప్రహరీ గోడ ఎక్కాడు. సీతా ఫలాలు తెంపుతుండగా ప్రమాదవశాత్తు ఆ గోడ బాలుడిపై కూలింది. స్థానికులు వెళ్లి చూడగా బాలుడు అక్కడికక్కడే మృతిచెందినట్లు గుర్తించారు. అల్లారు ముద్దుగా పెంచుకున్న తమ కుమారుడు ఉన్నపళంగా మృతి చెందడంతో తల్లిదండ్రుల రోదనలు మిన్నంటాయి. ఘటనాస్థలికి చేరుకున్న గ్రామస్తులు సైతం వీరి రోదన చూసి కన్నీటి పర్యంతమయ్యారు.