సహకార సమాఖ్య విధానానికి ఉత్తమ ఉదాహరణ BJP : సీఎం చంద్రబాబు
బీజేపీ వ్యవస్థాపక దినోత్సవం సందర్భంగా సీఎం చంద్రబాబు నాయుడు ఆ పార్టీ నేతలు, కార్యకర్తలకు శుభాకాంక్షలు తెలిపారు.
దిశ, వెబ్డెస్క్: సహకార సమాఖ్య విధానానికి ఉత్తమ ఉదాహరణగా ఎన్డీయే ప్రభుత్వం నిలుస్తోందని సీఎం చంద్రబాబు నాయుడు కొనియాడారు. భారతీయ జనతా పార్టీ (BJP) 47వ స్థాపన దినోత్సవం సందర్భంగా పార్టీ నాయకులు, కార్యకర్తలు, అభిమానులకు సీఎం చంద్రబాబు నాయుడు ఎక్స్ వేదికగా హృదయపూర్వకంగా శుభాకాంక్షలు తెలిపారు. "జాతీయవాదమే పునాదిగా, దేశ సర్వతో ముఖాభివృద్ధికి కట్టుబడి ఉన్న ఈ పార్టీ.. మన సంస్కృతిని, ప్రజాస్వామ్య విలువలను బలోపేతం చేయడంలోనూ, సమగ్ర అభివృద్ధిని ప్రోత్సహించడంలోనూ, దేశ సేవ అనే స్ఫూర్తిని చాటడంలోనూ నిరంతరం కృషి చేస్తోంది.
పార్టీ వ్యవస్థాపక నేతల నుంచి మాజీ ప్రధాని అటల్ బిహారీ వాజపేయి వరకు, ప్రస్తుతం ప్రధానమంత్రి నరేంద్ర మోదీ నాయకత్వంలో.. బీజేపీ నిర్ణయాత్మక పాలన, పురోగతి పట్ల స్పష్టమైన నిబద్ధతతో దేశాన్ని బలోపేతం చేసింది. ఆంధ్రప్రదేశ్లో డబుల్ ఇంజన్ NDA ప్రభుత్వం సరికొత్త ఉత్సాహంతో, వేగంతో ప్రజలకు సేవలు అందిస్తూ, సహకార సమాఖ్య స్ఫూర్తికి ఒక అద్భుతమైన నిదర్శనంగా నిలుస్తోంది. పార్టీ అధ్యక్షుడు నితిన్ నవీన్ నాయకత్వంలో.. దేశ సేవలో అంకితభావంతో పనిచేస్తూ, వికసిత్ భారత్ (అభివృద్ధి చెందిన భారత్) లక్ష్యం దిశగా మన ప్రయాణాన్ని మరింత బలోపేతం చేస్తూ, పార్టీ ఇలాగే విజయపథంలో సాగాలని ఆకాంక్షిస్తున్నాను." అని ఆ పోస్టులో సీఎం చంద్రబాబు పేర్కొన్నారు.
