ఒకడు రేప్ చేస్తే మరొకడు వీడియోలు తీశాడు.. వాటిని కాబోయే భర్తకు సెండ్ చేశాడు
దిశ, వెబ్ డెస్క్: రోజురోజుకు కొంతమంది వ్యక్తులు దుర్మార్గంగా ప్రవర్తిస్తున్నారు. కామంతో కళ్లు నెత్తికెక్కి ఇష్టానుసారంగా వ్యవహరిస్తూ అవతలివాళ్ల జీవితాలతో ఆడుకుంటున్నారు. మహబూబ్ నగర్ జిల్లాలో ఓ దారుణ ఘటన చోటు చేసుకుంది. మరికొద్ది రోజుల్లో పెళ్లి చేసుకోబోయే ఓ యువతిపై ఇద్దరు దుండగులు లైంగిక దాడికి పాల్పడ్డారు. అదంతా కూడా వీడియో తీసి కాబోయే భర్తకు పంపించారు. తెలిసిన సమాచారం మేరకు.. మహబూబ్ నగర్ జిల్లా కేంద్రంలో ఓ యువతి(20) దినసరి కూలీగా పని చేస్తూ ఉండేది. అయితే, ఆ యువతి తన గ్రామం నుంచి ప్రతి రోజూ జిల్లా కేంద్రానికి వచ్చి కూలి పని చేసుకుని తిరిగి ఇంటికి వెళ్లిపోయేది.
ఈ క్రమంలో అత్తగారింటి వద్ద ఉన్న తన భార్య కోసం ప్రతిరోజూ ఇతర గ్రామానికి చెందిన ఓ వ్యక్తి వస్తూ ఉండేవాడు. ఈ క్రమంలో కూలికి వెళ్లే యువతికి ఆ వ్యక్తి తన బండిపై అప్పుడప్పుడు లిఫ్ట్ ఇచ్చేవాడు. ఇలా తీసుకెళ్తున్న క్రమంలో ఇద్దరికి పరిచయం ఏర్పడింది. ఈ క్రమంలో ఇటీవల ఒకరోజు కూలి పని దొరకకపోవడంతో ఆ యువతి తిరిగి ఇంటికి బయలుదేరింది. అప్పుడప్పుడు ఆ యువతికి బైక్ పై లిఫ్ట్ ఇచ్చిన వ్యక్తి తన స్నేహితుడితో అక్కడికి వచ్చాడు. మేం మీకు పని ఇప్పిస్తామంటూ ఆ యువతిని తీసుకెళ్లి అత్యాచారానికి పాల్పడినట్లు సమాచారం. అంతేకాదు.. అదంతా కూడా వీడియో తీసి కాబోయే భర్తకు పంపించినట్లు తెలిసింది. కాబోయే భర్త ఆ వీడియోలను యువతి తల్లిదండ్రులకు చూపించడంతో విషయం వెలుగులోకి వచ్చినట్లు తెలిసింది. బాధితురాలి ఫిర్యాదు మేరకు కేసు నమోదు చేసుకున్న పోలీసులు నిందితులను అరెస్ట్ చేసినట్లుగా సమాచారం..
