భారత్‌లో అమెరికా విదేశాంగ మంత్రి మార్కో రూబియో.. ప్రధాని మోడీతో భేటీ

దిశ, డైనమిక్ బ్యూరో: అమెరికా విదేశాంగ మంత్రి మార్కో రూబియో శనివారం నాలుగు రోజుల అధికారిక పర్యటనకు గాను భారత్‌కు చేరుకున్నారు. గత ఏడాది కాలంగా ఇరు దేశాల మధ్య నెలకొన్న దౌత్యపరమైన ఉద్రిక్తతలను తొలగించి, ద్వైపాక్షిక సంబంధాలను పునరుద్ధరించడమే లక్ష్యంగా ఈ పర్యటన సాగుతోంది. భారత్ చేరుకున్న ఆయన తాజాగా ప్రధానమంత్రి నరేంద్ర మోడీతో సమావేశమయ్యారు.

కోల్‌కతా మీదుగా ఢిల్లీకి..

మార్కో రూబియో శనివారం ఉదయం తొలుత కోల్‌కతా చేరుకుని, అక్కడ సెయింట్ థెరిసాకు చెందిన ‘మదర్ హౌస్’ను సందర్శించారు. అనంతరం అక్కడి నుండి ఢిల్లీకి చేరుకున్న ఆయనకు యూఎస్ అంబాసిడర్ సెర్గియో గోర్ ఘన స్వాగతం పలికారు. అధ్యక్షుడు డొనాల్డ్ ట్రంప్ వ్యూహాత్మక దార్శనికతకు అనుగుణంగా ఇరు దేశాల బంధాన్ని బలోపేతం చేయడమే ఈ పర్యటన ముఖ్య ఉద్దేశమని గోర్ పేర్కొన్నారు.

చర్చించబోయే అంశాలు ఇవే..

మే 24 (ఆదివారం) భారత విదేశాంగ మంత్రి ఎస్. జైశంకర్‌తో రూబియో ద్వైపాక్షిక చర్చలు జరుపుతారు. అనంతరం యూఎస్ ఎంబసీ నిర్వహించే స్వాతంత్య్ర దినోత్సవ వేడుకల్లో పాల్గొంటారు. మే 25 (సోమవారం) ఆగ్రా, జైపూర్ నగరాలను సందర్శిస్తారు. మే 26 (మంగళవారం) తిరిగి ఢిల్లీ చేరుకుని ‘క్వాడ్’ (Quad) విదేశాంగ మంత్రుల సమావేశంలో పాల్గొంటారు. ఇరు దేశాల మధ్య ఇంధనం, వాణిజ్యం, పెట్టుబడులు, క్రిటికల్ టెక్నాలజీ, ప్రజల మధ్య సంబంధాల బలోపేతంతో పాటు పశ్చిమాసియా సంక్షోభం ఆర్థిక ప్రభావాలపై ఇరుపక్షాలు చర్చించనున్నాయి.

సంబంధాల పునరుద్ధరణే లక్ష్యం

జాతీయ మీడియా సమాచారం ప్రకారం.. గతేడాది మే నెలలో భారత్‌పై అమెరికా విధించిన శిక్షాత్మక సుంకాలు, భారత్-పాక్ సైనిక ఘర్షణలను తానే తగ్గించానంటూ అధ్యక్షుడు డొనాల్డ్ ట్రంప్ చేసిన వివాదాస్పద వ్యాఖ్యలను న్యూఢిల్లీ తీవ్రంగా ఖండించడంతో ఇరు దేశాల మధ్య సంబంధాలు దెబ్బతిన్నాయి. అలాగే అమెరికా నూతన వలస విధానం, హెచ్-1బీ (H1B) వీసా ఫీజుల పెంపు కూడా ఇందుకు కారణమయ్యాయి. అయితే, ఇటీవల ఏప్రిల్ 14న ప్రధాని మోడీ, అధ్యక్షుడు ట్రంప్ మధ్య జరిగిన 40 నిమిషాల ఫోన్ సంభాషణ, అలాగే విదేశాంగ కార్యదర్శి విక్రమ్ మిస్రీ వాషింగ్టన్ పర్యటనతో ఇరు దేశాల మధ్య సంబంధాలు మళ్లీ మెరుగవుతున్నాయి. వాణిజ్య ఒప్పందాన్ని త్వరలోనే ఖరారు చేయాలని ఇరుపక్షాలు నిర్ణయించుకున్నాయి.