ఇరాన్ వైపు అమెరికా నౌకాదళం.. ఇజ్రాయెల్లో హై అలర్ట్
పశ్చిమాసియాలో మరోసారి ఉద్రిక్త పరిస్థితులు నెలకొన్నాయి. ఇరాన్ వైపు అమెరికా తన భారీ సైనిక బలగాలను తరలిస్తుండటంతో యుద్ధ వాతావరణం కనిపిస్తోందని వార్తలు వస్తున్నాయి.
దిశ, డైనమిక్ బ్యూరో: పశ్చిమాసియాలో మరోసారి ఉద్రిక్త పరిస్థితులు నెలకొన్నాయి. ఇరాన్ వైపు అమెరికా తన భారీ సైనిక బలగాలను తరలిస్తుండటంతో యుద్ధ వాతావరణం కనిపిస్తోందని వార్తలు వస్తున్నాయి. అమెరికా అధ్యక్షుడు డొనాల్డ్ ట్రంప్ స్వయంగా "ఒక పెద్ద సైనిక దళం (Big Force) ఇరాన్ దిశగా కదులుతోంది" అని చెప్పడంతో అంతర్జాతీయ సమాజం ఉలిక్కిపడింది. ఈ పరిణామాల నేపథ్యంలో, ఒకవేళ ఇరాన్పై అమెరికా దాడి చేస్తే టెహ్రాన్ తమను లక్ష్యంగా చేసుకోవచ్చన్న భయంతో ఇజ్రాయెల్ తన సైన్యాన్ని "హై అలర్ట్"లో ఉంచింది.
జోర్డాన్ ఎయిర్ బేస్లకు ఫైటర్ జెట్లు!
ఇరాన్ను చుట్టుముడుతున్న అమెరికా బలగాలు ఇరాన్లో ఇటీవల జరిగిన ఆందోళనలు, వేలాది మంది నిరసనకారుల మరణాల నేపథ్యంలో అమెరికా దూకుడు పెంచింది. మధ్యప్రాచ్య కార్యకలాపాలను పర్యవేక్షించే 'యూఎస్ సెంట్రల్ కమాండ్' (CENTCOM) పరిధిలో అమెరికా తన బలాన్ని భారీగా పెంచుకుంటోంది. అధునాతన ఎఫ్-15ఈ (F-15E) స్ట్రైక్ ఈగిల్ ఫైటర్ జెట్లను జోర్డాన్ ఎయిర్ బేస్లకు తరలించారు. యుద్ధ విమాన వాహక నౌక 'యూఎస్ఎస్ అబ్రహం లింకన్' (USS Abraham Lincoln) ను వ్యూహాత్మకంగా ఇరాన్కు సమీపంలోకి పంపారు. వైమానిక, క్షిపణి రక్షణ వ్యవస్థలను కూడా అమెరికా పటిష్టం చేసింది.
అయోమయంలో ఇజ్రాయెల్
ట్రంప్ ప్రకటనలు ఇటు ఇరాన్ను భయపెడుతూనే, అటు మిత్రదేశం ఇజ్రాయెల్ను అయోమయానికి గురిచేస్తున్నాయి. డావోస్లో జరిగిన వేదికపై ట్రంప్ మాట్లాడుతూ, ‘సైన్యం వెళ్తోంది కానీ, యుద్ధం జరగకూడదని నేను కోరుకుంటున్నాను. నా హెచ్చరికల వల్లే ఇరాన్ 800 కి పైగా ఉరిశిక్షలను నిలిపివేసింది’ అని వ్యాఖ్యానించారు. అయితే, ట్రంప్ ఎప్పుడు ఏ నిర్ణయం తీసుకుంటారో తెలియకపోవడంతో (Unpredictability), ఇజ్రాయెల్ రక్షణ దళాలు (IDF) అత్యవసర పరిస్థితులకు సిద్ధమయ్యాయి. అమెరికా దాడి చేస్తే, ఇరాన్ నేరుగా లేదా తన ప్రాక్సీల ద్వారా ఇజ్రాయెల్పై ప్రతీకార దాడి చేసే ప్రమాదం ఉందని నెతన్యాహు ప్రభుత్వం ఆందోళన చెందుతోంది.
5 వేల మంది మృతి?
ఇరాన్లో ఇంటర్నెట్ సేవలను నిలిపివేసినప్పటికీ, అక్కడ జరుగుతున్న దారుణాలపై భయానక విషయాలు వెలుగులోకి వస్తున్నాయి. అల్లర్లలో సుమారు 5,000 మంది మరణించినట్లు రాయిటర్స్ నివేదించింది. ఈ పరిస్థితులపై ఆగ్రహంతో ఉన్న ట్రంప్.. ఇరాన్పై నిర్ణయాత్మక చర్యలు తీసుకోవాలని తన అధికారులను ఒత్తిడి చేస్తున్నట్లు తెలుస్తోంది. ప్రస్తుతానికి దాడికి ఆదేశాలు లేనప్పటికీ.. ఎఫ్-35 స్టెల్త్ జెట్లు, బీ-2 బాంబర్లు రంగంలోకి దిగితే పరిస్థితి అదుపు తప్పవచ్చని విశ్లేషకులు భావిస్తున్నారు. తమపై దాడి జరిగితే పూర్తి బలంతో విరుచుకుపడతామని ఇరాన్ విదేశాంగ మంత్రి అబ్బాస్ అరఘ్చి హెచ్చరించారు. దీంతో పశ్చిమాసియాలో ఏ క్షణాన ఏం జరుగుతుందోనన్న ఉత్కంఠ నెలకొంది.
