భారీగా ఉద్యోగాల కోత.. 10,000 మందికి ఉద్వాసన?

దిశ, వెబ్‌డెస్క్: స్విస్ బ్యాంకింగ్ దిగ్గజం యూబీఎస్ మరోసారి భారీ ఉద్యోగ కోతలకు సిద్ధమైంది. క్రెడిట్ సూయిజ్‌ను గత ఏడాది టేకోవర్ చేసిన తర్వాత వ్యయాలను భారీగా తగ్గించే క్రమంలో 2027 నాటికి ప్రపంచవ్యాప్తంగా సుమారు పది వేల మంది ఉద్యోగులను తొలగించే అవకాశం ఉందని స్విట్జర్లాండ్‌కు చెందిన ప్రముఖ వార్తాపత్రిక సోంటాగ్స్‌బ్లిక్ వెల్లడించింది. ప్రస్తుతం యూబీఎస్‌లో దాదాపు ఒక లక్షా పది వేల మంది ఉద్యోగులు పనిచేస్తున్నారు. ఈ కొత్త కోతలు అమలైతే మొత్తం సిబ్బందిలో తొమ్మిది శాతం వరకు తగ్గుతారని అంచనా. అయితే బ్యాంకు అధికారులు ఈ సంఖ్యను ఇంకా ధృవీకరించలేదు.

ఉద్యోగ కోతలను గరిష్టంగా తగ్గించేందుకు సహజ వైదొలిగే వారు, ముందస్తు రిటైర్మెంట్, అంతర్గత బదిలీల ద్వారానే ఎక్కువ ఖాళీలను నింపుతామని యూబీఎస్ తెలిపింది. 2023లో క్రెడిట్ సూయిజ్ సంక్షోభంలో చిక్కుకున్నప్పుడు దాన్ని యూబీఎస్ రక్షించి తీసుకోవడం జరిగింది. అప్పటి నుంచి వ్యయ నిర్మూలన కార్యక్రమం కొనసాగుతోంది. గత ఏడాది జూన్‌లో విలీనం పూర్తయిన సమయంలో రెండు బ్యాంకుల్లో కలిపి ఒక లక్షా 19 వేల మందికి పైగా సిబ్బంది ఉండగా, ఈ ఏడాది సెప్టెంబర్ నాటికి ఆ సంఖ్య ఒక లక్షా నాలుగు వేల వరకు తగ్గిపోయింది. అంటే ఇప్పటికే దాదాపు పదిహేను వేల ఉద్యోగాలు తగ్గాయన్నమాట.

స్విట్జర్లాండ్‌లోనే సుమారు మూడు వేల మంది ఉద్యోగాలను తొలగించే ప్రకటన గతంలోనే చేశారు. ఆ సంఖ్యలో మార్పు లేదని యూబీఎస్ మళ్లీ స్పష్టం చేసింది. 2008 ఆర్థిక సంక్షోభం తర్వాత ప్రపంచ బ్యాంకింగ్ రంగంలో జరిగిన అతిపెద్ద విలీనంగా నిలిచిన ఈ ఒప్పందంతో 167 ఏళ్ల చరిత్ర కలిగిన క్రెడిట్ సూయిజ్ పేరు శాశ్వతంగా అంతరించిపోయింది. ఇప్పుడు మరో దశ కోతలు రాబోతున్న నేపథ్యంలో యూబీఎస్ ఉద్యోగుల్లో ఆందోళన కొనసాగుతోంది.