యూఏఈ కీలక నిర్ణయం.. ప్రభుత్వ సేవల్లో 50 శాతం ‘ఏఐ’కే!

దిశ, డైనమిక్ బ్యూరో: యునైటెడ్ అరబ్ ఎమిరేట్స్ (యూఏఈ) ప్రభుత్వం సాంకేతిక రంగంలో మరో సంచలన అడుగు వేసింది. రాబోయే రెండేళ్లలో (2028 నాటికి) ప్రభుత్వ కార్యకలాపాలు, సేవల్లో 50 శాతాన్ని పూర్తిగా ఆర్టిఫిషియల్ ఇంటెలిజెన్స్ (AI) కు అప్పగించనున్నట్లు ప్రకటించింది. ఈ మేరకు యూఏఈ ఉపాధ్యక్షుడు, ప్రధాని షేక్ మహ్మద్ బిన్ రషీద్ అల్ మఖ్తుమ్ వివరాలను వెల్లడించారు.

ఏజెంటిక్ ఏఐతో వేగవంతమైన సేవలు

ప్రభుత్వ యంత్రాంగంలో ‘ఏజెంటిక్ ఏఐ’ (Agentic AI) సిస్టమ్స్ వినియోగాన్ని విస్తృతంగా అమలు చేయనున్నారు. దీని ద్వారా మానవ ప్రమేయం అతి తక్కువగా ఉంటుంది. దైనందిన పనులు, డేటా విశ్లేషణ, కీలక నిర్ణయాలు తీసుకోవడం వంటివి ఏఐ స్వయంగా చేస్తుంది. ఫలితంగా అధికారుల చుట్టూ తిరిగే పని తగ్గడంతో పాటు (బ్యూరోక్రసీ), భారీగా ఖర్చులు ఆదా అవుతాయని, సేవలు ప్రజలకు మరింత వేగంగా అందుతాయని ప్రభుత్వం భావిస్తోంది.

ఉద్యోగులకు శిక్షణ - పనితీరుపై సమీక్ష

ఈ భారీ ప్రక్షాళనలో భాగంగా ప్రభుత్వ ఉద్యోగులందరికీ ఏఐ నిర్వహణపై ప్రత్యేక శిక్షణ ఇవ్వనున్నారు. అలాగే, ప్రభుత్వ విభాగాలు ఎంత వేగంగా ఏఐ సాంకేతికతను అందిపుచ్చుకుంటున్నాయి, తమ దైనందిన విధుల్లో ఎలా అనుసంధానిస్తున్నాయి అనే దానిపై ఎప్పటికప్పుడు అంచనా వేస్తారు. గత రెండు దశాబ్దాలుగా యూఏఈ అమలు చేస్తున్న ఈ-గవర్నెన్స్ (యూఏఈ పాస్, గవర్నమెంట్ సర్వీసెస్ 2.0) సంస్కరణలకు ఈ నిర్ణయం ఒక కొనసాగింపు. 2027 నాటికి పూర్తి ఏఐ ఆధారిత ప్రభుత్వంగా ఆవిర్భవించాలన్న అబుదాబి లక్ష్య సాధనలో భాగంగా ఈ జాతీయ వ్యూహాన్ని అమలు చేస్తున్నారు.