కువైట్ విమానాశ్రయంపై ఇరాన్ క్షిపణి దాడులు.. ఒకరి మృతి, పలువురికి గాయాలు

దిశ, డైనమిక్ బ్యూరో: కువైట్ అంతర్జాతీయ విమానాశ్రయంపై ఇరాన్ జరిపిన డ్రోన్, క్షిపణి దాడుల్లో ఒకరు ప్రాణాలు కోల్పోగా, పలువురు పౌరులు తీవ్రంగా గాయపడ్డారు. ఈ దాడుల కారణంగా విమానాశ్రయంలోని ప్రయాణికుల భవనం ‘T1’తో పాటు పలు దౌత్య కార్యాలయాలు తీవ్రంగా ధ్వంసమయ్యాయి. ఈ ఘటనతో అప్రమత్తమైన కువైట్ ప్రభుత్వం వెంటనే వాణిజ్య విమాన సర్వీసులను నిలిపివేసి, విమానాలను ఇతర ప్రాంతాలకు దారి మళ్లించింది. కువైట్ విదేశాంగ శాఖ ఈ దాడులను తీవ్రంగా ఖండించింది. కువైట్ ప్రధాన విమానాశ్రయాన్ని పాక్షికంగా తెరిచినట్లు పౌర విమానయాన అధికారులు తెలిపారు. దాడి జరిగిన టెర్మినల్ కాకుండా వేరొక టెర్మినల్ నుంచి కువైట్ ఎయిర్‌వేస్ విమానాలు మాత్రమే ప్రస్తుతం నడుస్తున్నాయని స్పష్టం చేశారు.

అమెరికా-ఇరాన్ మధ్య ఉద్రిక్తతలు

అంతర్జాతీయ మీడియా సమాచారం ప్రకారం.. అమెరికా, ఇరాన్ మధ్య ఉద్రిక్తతలు తారాస్థాయికి చేరుకున్న నేపథ్యంలో ఈ దాడులు చోటుచేసుకున్నాయి. బహ్రెయిన్, కువైట్‌లను లక్ష్యంగా చేసుకుని ఇరాన్ ప్రయోగించిన క్షిపణులను అమెరికా, బహ్రెయిన్ దళాలు మార్గమధ్యంలోనే విజయవంతంగా అడ్డుకున్నాయి. ఇందుకు ప్రతీకారంగా ఇరాన్‌లోని కేశ్మ్ (Qeshm) దీవిలో ఉన్న సైనిక స్థావరంపై అమెరికా దళాలు దాడులు చేశాయి. బహ్రెయిన్‌లోని తమ నావికాదళం (యూఎస్ నేవీ 5వ ఫ్లీట్) ప్రధాన కార్యాలయంపై ఇరాన్ దాడి చేసిందన్న వాదనలను అమెరికా సెంట్రల్ కమాండ్ తోసిపుచ్చింది.

మరోవైపు లెబనాన్‌పై ఇజ్రాయెల్ దాడులు

మిడిల్ ఈస్ట్‌లో మరోవైపు ఉద్రిక్తతలు కొనసాగుతూనే ఉన్నాయి. లెబనాన్ రాజధాని బీరుట్ సమీపంలోనూ, దక్షిణ ప్రాంతంలోనూ ఇజ్రాయెల్ జరిపిన దాడుల్లో ఆరుగురు మరణించినట్లు సమాచారం. లెబనాన్ నుంచి తమ భూభాగంలోకి ప్రవేశించిన ఒక శత్రు విమానాన్ని ఇజ్రాయెల్ సైన్యం అడ్డుకుంది. ఉత్తర ఇజ్రాయెల్‌పై హిజ్బుల్లా దాడులకు పాల్పడితే బీరుట్ దక్షిణ శివారు ప్రాంతాలపై విరుచుకుపడతామని ఇజ్రాయెల్ హెచ్చరించింది.