‘30 నిమిషాల్లో పేల్చేస్తాం’.. హార్ముజ్ వద్ద అమెరికా యుద్ధ నౌకకు ఇరాన్ వార్నింగ్

దిశ, డైనమిక్ బ్యూరో: పాకిస్తాన్‌లో ఇరు దేశాల మధ్య శాంతి చర్చలు జరుగుతున్న వేళ, హార్ముజ్ జలసంధి వద్ద అమెరికా, ఇరాన్ మధ్య తీవ్ర ఉద్రిక్తత నెలకొంది. జలసంధిని దాటేందుకు ప్రయత్నించిన అమెరికా యుద్ధ నౌకను ఇరాన్ తీవ్రంగా హెచ్చరించింది. ‘హార్ముజ్ దాటితే 30 నిమిషాల్లోనే పేల్చేస్తాం’ అని ఇరాన్ సైనికాధికారులు వార్నింగ్ ఇవ్వడంతో అమెరికా నౌక వెనక్కి తగ్గిందని అంతర్జాతీయ మీడియాలో వార్తలు వస్తున్నాయి.

జలసంధిని క్లియర్ చేస్తున్నాం: ట్రంప్

అయితే, ఇరాన్‌తో ఎలాంటి సమన్వయం లేకుండానే పలు అమెరికా నావికాదళ నౌకలు శనివారం జలసంధిని దాటాయి. యుద్ధం ప్రారంభమైన తర్వాత ఇలా జరగడం ఇదే తొలిసారి. దీనిపై అమెరికా అధ్యక్షుడు డొనాల్డ్ ట్రంప్ స్పందిస్తూ.. ప్రపంచ దేశాల చమురు సరఫరాకు ఆటంకం కలగకుండా తామే చొరవ తీసుకుని హార్ముజ్ జలసంధిని క్లియర్ చేస్తున్నామని తెలిపారు. ఇరాన్ సహకారం ఉన్నా లేకున్నా జలసంధి త్వరలోనే పూర్తిస్థాయిలో తెరుచుకుంటుందని ఆయన స్పష్టం చేశారు.

జలసంధిని దాటిన భారత నౌక ‘జగ్ విక్రమ్’

నెల రోజుల ఘర్షణ తర్వాత అమెరికా, ఇరాన్ దేశాలు ఇటీవల రెండు వారాల పాటు తాత్కాలిక కాల్పుల విరమణను ప్రకటించాయి. ఈ నేపథ్యంలో గ్రీక్ నౌకతో పాటు చైనాకు చెందిన రెండు భారీ చమురు నౌకలు (సూపర్ ట్యాంకర్లు) జలసంధిని దాటాయి. అలాగే, భారత జెండాతో ఉన్న ఎల్‌పీజీ నౌక ‘జగ్ విక్రమ్’ కూడా హార్ముజ్ జలసంధిని విజయవంతంగా దాటింది. కాల్పుల విరమణ తర్వాత ఈ జలసంధిని దాటిన తొలి భారతీయ నౌక ఇదే.

గల్ఫ్‌లోనే చిక్కుకున్న వందలాది నౌకలు

చమురు రవాణా నెమ్మదిగా పుంజుకుంటున్నప్పటికీ, వాణిజ్య రవాణా ఇంకా సాధారణ స్థాయికి చేరుకోలేదు. ఈ నౌకలేవీ ఇరాన్ చమురును రవాణా చేయడం లేదు. యుద్ధానికి ముందు రోజుకు సగటున 135 నౌకలు ఇక్కడి నుంచి రాకపోకలు సాగించగా, కాల్పుల విరమణ తర్వాత కేవలం 22 నౌకలు మాత్రమే జలసంధి నుంచి బయటకు వచ్చాయి. తాజా సమాచారం ప్రకారం, గల్ఫ్ ప్రాంతంలో 325 ఆయిల్ ట్యాంకర్లు సహా 600కు పైగా నౌకలు ఇంకా చిక్కుకుపోయి ఉన్నట్లు నివేదికలు చెబుతున్నాయి.