Africa CDC: ఆఫ్రికాకు ఆపద్బాంధవుడిగా భారత్.. రెండో విడతగా 43 టన్నుల వైద్య సాయం

దిశ, డైనమిక్ బ్యూరో: ఎబోలా మహమ్మారిని ఎదుర్కొంటున్న ఆఫ్రికా దేశాలకు అండగా నిలిచేందుకు భారతదేశం 43 టన్నుల వైద్య సామగ్రితో కూడిన రెండో విడత సాయాన్ని పంపింది. ‘ఆఫ్రికా సెంటర్ ఫర్ డిసీజ్ కంట్రోల్ అండ్ ప్రివెన్షన్’ (Africa CDC) కి ఈ సామగ్రిని పంపిణీ చేశారు. ఈ వైద్య సాయంలో రక్షణ పరికరాలు (Protective gear), రోగ నిర్ధారణ యంత్రాలు, మందులు, ఇతర అత్యవసర వైద్య సామగ్రి ఉన్నాయి.

ప్రజారోగ్య వ్యవస్థ బలోపేతానికి కృషి: మంత్రి జైశంకర్

ఈ 43 టన్నుల సాయం ఆఫ్రికన్ యూనియన్ పరిధిలో ఎబోలా కట్టడికి, ప్రజారోగ్య వ్యవస్థ బలోపేతానికి ఎంతగానో ఉపకరిస్తుందని విదేశీ వ్యవహారాల మంత్రి ఎస్. జైశంకర్ 'ఎక్స్' (X) వేదికగా ఆశాభావం వ్యక్తం చేశారు. డెమొక్రాటిక్ రిపబ్లిక్ ఆఫ్ కాంగో (DRC) లో ఎబోలా కట్టడికి భారత్ అందిస్తున్న అత్యవసర సాయాన్ని ఆఫ్రికా సీడీసీ స్వాగతించింది. తమకు అండగా నిలుస్తున్న భారత ప్రభుత్వానికి, ప్రజలకు వారు ప్రత్యేక కృతజ్ఞతలు తెలిపారు. కాగా, కాంగోలో విస్తరిస్తున్న ఎబోలాను అరికట్టేందుకు భారత్ మే 29న మొదటి విడత అత్యవసర వైద్య సాయాన్ని పంపిన విషయం తెలిసిందే. ఆఫ్రికా ఆరోగ్య అధికారులతో ఎప్పటికప్పుడు సంప్రదింపులు జరుపుతున్నామని, అక్కడి పరిస్థితులను బట్టి భవిష్యత్తులోనూ వైద్య, లాజిస్టికల్ మద్దతును అందించేందుకు సిద్ధంగా ఉన్నట్లు భారత ప్రభుత్వం స్పష్టం చేసింది.