Elon Musk మరో కీలక నిర్ణయం.. ఇకపై ఆ కౌన్సిల్ రద్దు

దిశ, డైనమిక్ బ్యూరో: ట్విట్టర్‌ అధినేత ఎలన్‌ మస్క్‌ మరో కీలక నిర్ణయం తీసుకున్నారు. ట్విటర్‌లోని 'ట్రస్ట్‌ అండ్‌ సేఫ్టీ కౌన్సిల్‌'ను రద్దు చేస్తున్నట్లు ప్రకటించారు. బాలలపై ఆకృత్యాలు, ఆత్మహత్యలు, విద్వేష ప్రసంగాలు సహా ఇతర సమస్యలను ట్విట్టర్‌‌లో సమర్థంగా ఎదుర్కొనేందుకు 2016లో అప్పటి యాజమాన్యం ఈ కౌన్సిల్‌ను ఏర్పాటు చేసింది. దీనిలో 100 మంది స్వతంత్ర సభ్యులు ఉండేవారు. ఈ బృందం సభ్యులను తొలగిస్తున్నట్లు మస్క్ బృందం మెయిల్ పంపింది. ట్విట్టర్‌ను మరింత భద్రత గల వేదికగా మారుస్తామని పేర్కొంది. అయితే, ఇందులో తొలగించిన వ్యక్తులు పలు పౌర, మానవతా సంస్థలకు చెందిన వ్యక్తులు తమ సేవల్ని అందించేవారు. సోమవారం రాత్రి ఈ కౌన్సిల్‌ సమావేశం కావాల్సి ఉంది. కానీ, కొన్ని గంటల ముందు పూర్తిగా కౌన్సిల్‌నే రద్దు చేస్తున్నట్లు మస్క్‌ బృందం సభ్యులకు మెయిల్‌ పంపింది.