మట్టిలోని బాక్టీరియాతో క్యాన్సర్‌కు చెక్.. శాస్త్రవేత్తల కొత్త ప్రయోగం!

దిశ, ఫీచర్స్ : క్యాన్సర్ మహమ్మారిని ఎదుర్కొనే మెరుగైన వైద్య చికిత్సలపై పరిశోధకులు చాలా కాలంగా పనిచేస్తున్నారు. ఇందులో భాగంగా యూనివర్సిటీ ఆఫ్ వాటర్‌లూ(University of Waterloo), కెనడా శాస్త్రవేత్తలు ఒక కొత్త పద్ధతిని కనుగొన్నారు. ఏంటంటే.. ఇంజనీర్డ్ బ్యాక్టీరియాను ఉపయోగించి క్యాన్సర్‌ను లోపలి నుంచి ఎదుర్కోవడానికి ప్రయత్నిస్తున్నారు. అదెలాగో ఇప్పుడూ చూద్దాం.

జన్యు ఇంజనీరింగ్‌తో మార్చి..

పరిశోధకులు క్లోస్ట్రిడియం స్పోరోజెన్స్ (Clostridium sporogenes) అనే బ్యాక్టీరియాను క్యాన్సర్ నివారణ చికిత్సలో ఉపయోగించే విధానాన్ని డెవలప్ చేశారు. నిజానికి ఇది మట్టిలో సహజంగా దొరికే బ్యాక్టీరియా. ఆక్సిజన్ లేని(hypoxic) ప్రాంతాల్లో బాగా వృద్ధి చెందుతుంది. అయితే పరిశోధకులు దీనిని జన్యు ఇంజనీరింగ్ ద్వారా మార్చి, ఆక్సిజన్‌ను కొంత సహించే సామర్థ్యం ఇచ్చారు. అంతేకాకుండా కోరం సెన్సింగ్ (Quorum sensing-బ్యాక్టీరియా సమ్మేళనం) ద్వారా ‘ఆన్/ఆఫ్ స్విచ్’ వ్యవస్థను ఏర్పాటు చేశారు.

క్యాన్సర్ కణాల ధ్వంసం..

క్యాన్సర్ల విషయానికి వస్తే.. చాలా సాలిడ్ ట్యూమర్ల మధ్య భాగంలో ఆక్సిజన్ చాలా తక్కువగా ఉంటుంది. సాధారణ చికిత్సలు అక్కడికి చేరుకోవడం కష్టం. కానీ క్లోస్ట్రిడియం స్పోరోజెన్స్ బ్యాక్టీరియాలు తక్కువ ఆక్సిజన్ ఉన్న ప్రాంతాల్లో సహజంగా బాగా వృద్ధి చెందుతాయి కాబట్టి.. అవి ట్యూమర్ లోపలికి చేరి, క్యాన్సర్ కణాలను లోపలి నుంచి ధ్వంసం చేస్తాయని పరిశోధకులు అంటున్నారు. క్యాన్సర్‌ను ఖచ్చితంగా ఎదుర్కోవడం, సాధారణ కణాలకు నష్టం తక్కువ కలగడమే ఈ పద్ధతి ప్రధాన లక్ష్యమని చెబుతున్నారు. ప్రస్తుతం ఈ పరిశోధన ఇంకా ప్రయోగాత్మక దశలో ఉంది. ఇంకా మానవులపై ఎటువంటి పరీక్షలు జరగలేదు. మరిన్ని ల్యాబ్ అధ్యయనాలు, క్లినికల్ ట్రయల్స్ అవసరమని పరిశోధకులు చెబుతున్నారు. అయితే భవిష్యత్తులో మందులతో పాటు జీవన బ్యాక్టీరియా లేదా ప్రోగ్రామబుల్ సెల్స్ ద్వారా క్యాన్సర్‌ను ఓడించే అవకాశాలు మెరుగుపడతాయనే ఆశలను ఈ పరిశోధన రేకెత్తిస్తున్నదని నిపుణులు పేర్కొంటున్నారు.