కాసినోల్లో ఆ కలర్ లైటింగ్ మానసిక నిర్ణయాలను ప్రభావితం చేస్తుందా?

దిశ, వెబ్‌డెస్క్: ఆసీస్‌ శాస్త్రవేత్తలు నిర్వహించిన తాజా అధ్యయనం ప్రకారం.. కాసినోల్లో లేదా గాంబ్లింగ్ యాప్‌లలో కనిపించే బ్లూ కలర్ లైటింగ్.. మనకు నష్టాలు తక్కువగా అనిపించేలా చేసి, ధైర్యంగా పందెం వేయించేలా ప్రభావితం చేస్తుందని తేలింది. Scientific Reports అనే జర్నల్‌లో ఈ రీసెర్చ్ పబ్లిష్ అయింది.

ఆస్ట్రేలియాలోని ఫ్లిండర్స్ విశ్వవిద్యాలయం (Flinders University), మోనాష్ విశ్వవిద్యాలయం (Monash University)కి చెందిన శాస్త్రవేత్తలు కలిసి చేసిన ఈ పరిశోధనలో.. నీలి కాంతిలో ఎక్కువగా ఉండే LED లైటింగ్ మన మెదడులో కొన్ని మార్పులు కలిగించిందని తెలిపారు. ఫలితంగా.. నష్టానికి తక్కువ స్పందన, లాభం కోసం ఎక్కువ రిస్క్ తీసుకునే ప్రవృత్తి పెరిగిందని వారు వెల్లడించారు.

18 నుండి 27 సంవత్సరాల మధ్య వయస్సు గల 15 మందిని ఈ అధ్యయనంలో భాగంగా పలు కృత్రిమ గాంబ్లింగ్ పరీక్షలు చేయించగా, వారిని రెండు వేర్వేరు లైటింగ్ పరిసరాల్లో పరీక్షించారు. ఒకటి నీలిరంగు అధికంగా ఉండే లైటింగ్, మరొకటి తక్కువగా ఉండే లైటింగ్. వాటిలో.. నీలిరంగు ఎక్కువగా ఉండే వెలుతురులో ఉన్నవారు తక్కువ నష్టాలను ఎక్కువగా పట్టించుకోలేదు. కానీ మరింత రిస్క్‌ తీసుకునేందుకు మొగ్గు చూపారు.

పురుషులు మహిళల కంటే ఎక్కువగా రిస్క్ తీసుకున్నారని కూడా ఈ అధ్యయనంలో తేలింది. ఇది గత గాంబ్లింగ్ పరిశోధనలతో కూడా సరిపోతుంది. ఇది సాధారణ కంటితో కనిపించే కాంతిపై కాకుండా.. మన శరీరంలో ఉండే సర్కేడియన్ ఫొటోరిసెప్షన్ (circadian photoreception) వ్యవస్థ ద్వారా ప్రభావం చూపుతోంది. మన కళ్లలోని కొన్ని కణాలు నీలి కాంతికి స్పందించి.. నిర్ణయాలు, భావోద్వేగ నియంత్రణ, రిస్క్, రివార్డ్ ప్రక్రియలను ప్రభావితం చేసే మెదడు భాగాలను ఉత్తేజిత పరుస్తాయని శాస్త్రవేత్తలు అంచనా వేస్తున్నారు.

ఈ ఫలితాల నేపథ్యంలో.. శాస్త్రవేత్తలు కాసినో లైటింగ్ డిజైన్ పై ఎథికల్ ప్రశ్నలు లేవనెత్తుతున్నారు. వినియోగదారుల మానసిక స్థితిని ప్రభావితం చేస్తూ, జాగ్రత్తలు తప్పించి, పెద్ద మొత్తంలో డబ్బు ఖర్చు చేయించేలా చేయడం ఉద్యోగపరంగా లాభం అయినా, సామాజికంగా ప్రమాదకరం అని హెచ్చరిస్తున్నారు.

ఈ అధ్యయనం చిన్న శాంపిల్‌తో మాత్రమే జరిపినప్పటికీ.. దీని ఫలితాలు గాంబ్లింగ్ నియంత్రణపై భవిష్యత్తులో మార్గనిర్దేశం చేసేలా ఉండొచ్చని నిపుణులు భావిస్తున్నారు. సాధారణంగా ఉపయోగించే కాసినో LED లైట్స్‌లో నీలిరంగు ప్రభావాన్ని తగ్గించడం ద్వారా గాంబ్లింగ్ వినియోగదారుల నిర్ణయాలపై మంచి ప్రభావం చూపవచ్చని వారు సూచిస్తున్నారు.