జాతీయ ఉత్తమ సర్పంచ్ అవార్డు అందుకున్న లపంగి నర్సింహా

దిశ, మర్రిగూడ : మండలంలోని రాంరెడ్డిపల్లి గ్రామ సర్పంచ్, ఉమ్మడి నల్గొండ జిల్లా సర్పంచ్‌ల సంఘం అధ్యక్షుడు లపంగి నర్సింహాకు జాతీయ ఉత్తమ సర్పంచ్ అవార్డు–2026 లభించింది. తెలంగాణ రాష్ట్ర సాంఘిక సంక్షేమ శాఖ మంత్రి అడ్లూరి లక్ష్మణ్ కుమార్ చేతుల మీదుగా ఆయన ఈ ప్రతిష్ఠాత్మక అవార్డును అందుకున్నారు. ఈ సందర్భంగా లపంగి నర్సింహా మాట్లాడుతూ.. ఈ అవార్డు తన వ్యక్తిగత గుర్తింపు మాత్రమే కాదని, రాంరెడ్డిపల్లి గ్రామ ప్రజలకు, గ్రామాభివృద్ధికి, ప్రజాసేవకు లభించిన గౌరవంగా భావిస్తున్నట్లు తెలిపారు. గ్రామ ప్రజలు, పంచాయతీ సభ్యులు, అధికారులు, కుటుంబ సభ్యులు, స్నేహితులు అందించిన సహకారంతోనే ఈ గుర్తింపు సాధ్యమైందని పేర్కొంటూ వారికి కృతజ్ఞతలు తెలిపారు. భవిష్యత్తులో కూడా గ్రామాభివృద్ధి, ప్రజా సంక్షేమం కోసం మరింత అంకితభావంతో పనిచేస్తానని స్పష్టం చేశారు.