మహిళపై విచక్షణారహితంగా కుక్కల దాడి.. వణుకు పుట్టిస్తున్న సీసీ టీవీ ఫుటేజ్

దిశ, వెబ్‌డెస్క్: మహారాష్ట్రలోని పూణే (Pune) నగరంలో వీధి కుక్కల దాడి మరో ప్రాణాన్ని బలితీసుకుంది. నగరంలోని చకన్ (Chakan) ప్రాంతంలో తెల్లవారుజామున జరిగిన ఈ భయానక ఘటన స్థానికంగా తీవ్ర కలకలం రేపింది. ఏకంగా 6 నుంచి 7 కుక్కలు ఒకేసారి దాడి చేయడంతో ఓ మహిళ అక్కడికక్కడే ప్రాణాలు కోల్పోయింది. పోలీసుల కథనం ప్రకారం.. ఇవాళ తెల్లవారుజామున సుమారు 2.15 గంటల ప్రాంతంలో చకన్ రోడ్డుపై ఓ మహిళ ఒంటరిగా నడుచుకుంటూ వెళ్తోంది. ఈ క్రమంలోనే అక్కడే పొంచి ఉన్న ఆరు నుంచి 7 వీధి కుక్కలు ఒక్కసారిగా ఆమెపై దాడికి తెగబడ్డాయి. కుక్కల దాడి నుంచి తప్పించుకోవడానికి ఆమె తీవ్రంగా ప్రయత్నించినప్పటికీ, అవి ఆమెను చుట్టుముట్టి విచక్షణా రహితంగా కరిచాయి.

ఈ మేరకు సమాచారం అందుకున్న పోలీసులు ఘటనా స్థలానికి చేరుకుని పరిశీలించారు. కుక్కల దాడిలో మహిళ మృతదేహం పూర్తిగా ఛిద్రమైనట్లుగా పోలీసులు తెలిపారు. ఘటనా స్థలంలో లభించిన సీసీటీవీ (CCTV) ఫుటేజీని పరిశీలించిన అనంతరం మహిళ మృతికి కుక్కల దాడే కారణమని పోలీసులు ప్రాథమికంగా నిర్ధారించారు. ఈ ఘటనతో పూణేలో వీధి కుక్కల సమస్య మరోసారి చర్చనీయాంశంగా మారింది. అధికారులు తక్షణమే స్పందించి వీధి కుక్కల నియంత్రణకు చర్యలు తీసుకోవాలని స్థానికులు డిమాండ్ చేస్తున్నారు.