పాట్నా వంతెన విప్పిన పిల్లలు.. నాణ్యతకు తిలోదకాలు? వీడియో వైరల్

దిశ, వెబ్‌డెస్క్: బీహార్ రాజధాని పాట్నాలో నూతనంగా నిర్మించిన డబుల్ డెక్కర్ ఫ్లైఓవర్‌ (Patna's double-decker flyover)కు సంబంధించిన ఒక వీడియో సోషల్ మీడియాలో వైరల్‌గా మారింది. ఈ వీడియోలో కొందరు పిల్లలు వంతెనపై కీలకమైన నట్-బోల్ట్‌లను తొలగిస్తున్న దృశ్యాలు కనిపించాయి. దీంతో ప్రజలలో ఆందోళన ఆగ్రహం వ్యక్తమవుతోంది. ఈ ఘటన ప్రజా భద్రత, మౌలిక సదుపాయాల నిర్మాణ నాణ్యతపై తీవ్ర చర్చను రేకెత్తించింది.

ఈ డబుల్ డెక్కర్ ఫ్లైఓవర్‌ను ఇటీవల ఇంజనీరింగ్ విజయంగా ప్రశంసించారు. అయితే ఈ వీడియో బయటకు రావడంతో నిర్మాణంలో లోపాలు మరియు పర్యవేక్షణలో నిర్లక్ష్యం ఉన్నాయనే ఆరోపణలు వెల్లువెత్తాయి. స్థానిక అధికారులు ఈ ఘటనపై దర్యాప్తు ప్రారంభించినట్లు తెలిపారు. వంతెన భద్రతను తిరిగి పరిశీలించడంతో పాటు, ఇటువంటి సంఘటనలు పునరావృతం కాకుండా చర్యలు తీసుకోవాలని నిర్ణయించారు.

సోషల్ మీడియాలో నెటిజన్లు ఈ వీడియోను విస్తృతంగా షేర్ చేస్తూ.. ప్రభుత్వం, నిర్మాణ సంస్థలపై తీవ్ర విమర్శలు గుప్పించారు. "ఇంత పెద్ద వంతెనను పిల్లలు సులభంగా దెబ్బతీయగలరా? ఇది నిర్మాణ నాణ్యతపై అనుమానాలు లేవనెత్తుతోంది." అని ఓ నెటిజన్ ట్వీట్ చేశారు. మరికొందరు ఈ ఘటనను ప్రమాదకరమైన నిర్లక్ష్యంగా అభివర్ణించారు.

అధికారులు ప్రజలను ఆందోళన చెందవద్దని, వంతెన భద్రతను నిర్ధారించేందుకు తక్షణ చర్యలు తీసుకుంటున్నామని హామీ ఇచ్చారు. ఈ ఘటనకు సంబంధించిన పూర్తి వివరాలు, దర్యాప్తు ఫలితాల కోసం అధికారిక ప్రకటన కోసం ప్రజలు ఎదురుచూస్తున్నారు.