Google Maps : గూగుల్ను నమ్ముకుంటే.. ప్రాణాలు మీదకు వచ్చిన వైనం..
ప్రస్తుత డిజిటల్ యుగంలో గూగుల్ మ్యాప్స్ జీవితానికి ఓ భాగంగా మారిపోయాయి. పట్టణాల్లో, కొత్త ప్రాంతాల్లో దారి తెలియని సమయంలో ఈ మ్యాప్లు ఎంతో సహాయపడతాయి. అయితే ఇదే సాంకేతికత, కొన్నిసార్లు ప్రాణాలకు ముప్పుగా మారుతోంది.
దిశ, వెబ్ డెస్క్ : ప్రస్తుత డిజిటల్ యుగంలో గూగుల్ మ్యాప్స్ జీవితానికి ఓ భాగంగా మారిపోయాయి. పట్టణాల్లో, కొత్త ప్రాంతాల్లో దారి తెలియని సమయంలో ఈ మ్యాప్లు ఎంతో సహాయపడతాయి. అయితే ఇదే సాంకేతికత, కొన్నిసార్లు ప్రాణాలకు ముప్పుగా మారుతోంది. తాజాగా కేరళలో చోటుచేసుకున్న ఘటన ఈ విషయం మరోసారి గుర్తు చేస్తోంది. జూన్ 1, ఆదివారం: కేరళలోని కన్నూర్ జిల్లాలో ఓ కుటుంబం కారులో ప్రయాణిస్తూ గూగుల్ మ్యాప్స్ సాయంతో ముందుకెళ్లారు. మెయిన్ రోడ్డులో షార్ట్కట్ చూపించడంతో, డ్రైవర్ వెళ్తున్న దారి మళ్లించి మ్యాప్ సూచించిన మార్గాన్ని అనుసరించారు. కానీ ఆ మార్గం వారిని నేరుగా ఓ చెరువు వైపు తీసుకెళ్లింది. ఆ దారిలో కొద్ది దూరం వెళ్లగానే కారు అదుపుతప్పి నేరుగా నీటిలోకి దూసుకుపోయింది.
సమీపంలో ఉన్న స్థానికులు ప్రమాదాన్ని గమనించి వెంటనే స్పందించారు. మునిగిపోతున్న కారును తాళ్లతో వెలికి తీయగా, కారులో ఉన్న ఐదుగురిని సురక్షితంగా బయటికి తీసుకువచ్చారు. గాయపడిన వారిని ఆసుపత్రికి తరలించారు. అందులో ముగ్గురి పరిస్థితి విషమంగా ఉన్నట్లు సమాచారం. బాధితులు ఈ ప్రమాదానికి గూగుల్ మ్యాప్ లో చూపిన తప్పుదారి కారణమేనని ఆరోపిస్తున్నారు. ఈ ఘటనపై కేసు నమోదు చేసుకున్న పోలీసులు – ఇది గూగుల్ మ్యాప్ లోపమా, లేక డ్రైవర్ పొరపాటా అన్న కోణాల్లో దర్యాప్తు చేస్తున్నారు. ఇదే సమయంలో నిపుణులు ప్రజలను అప్రమత్తం చేస్తున్నారు. "గూగుల్ మ్యాప్తోపాటు స్థానికులను అడిగి, మ్యాప్ సూచనలను క్రాస్ చెక్ చేసుకోవాలి. పాత వెర్షన్లతో కాకుండా మ్యాప్ను ఎప్పటికప్పుడు అప్డేట్ చేసి వాడాలి" అంటూ హెచ్చరిస్తున్నారు.
గూగుల్ మ్యాప్స్ వంటి సాంకేతికతలు జీవన విధానంలో తప్పనిసరిగా మారినా, వాటిపై పూర్తిగా ఆధారపడకూడదు. ప్రతి మార్గం సురక్షితమని గూగుల్ చెబుతుందన్న భ్రమ ప్రమాదకరంగా మారవచ్చు. అందుకే, ప్రయాణాల సమయంలో తగిన జాగ్రత్తలు తీసుకోవడం ప్రాణాలకు రక్షణ గోడలా పనిచేస్తుంది.
