Fact Check : అద్భుతమా.. అబద్ధమా? సముద్ర గర్భంలో శ్రీకృష్ణుడి విగ్రహం..?

దిశ, వెబ్‌ డెస్క్‌ : సామాజిక మాధ్యమాలు, కృత్రిమ మేధస్సు (AI) శకం నడుస్తోంది. ప్రతిరోజూ ఎన్నో నకిలీ వార్తలు, తప్పుడు వీడియోలు వైరల్ అవుతూ ప్రజలను తప్పుదోవ పట్టిస్తున్నాయి. అలాంటి వాటి పట్ల అప్రమత్తంగా ఉండటం చాలా ముఖ్యం. తాజాగా, శ్రీకృష్ణుడి విగ్రహానికి సంబంధించిన ఒక నకిలీ వీడియో సోషల్ మీడియాలో చక్కర్లు కొడుతోంది. సోషల్ మీడియాలో విపరీతంగా వైరల్ అవుతున్న ఒక వీడియోలో, స్కూబా డ్రైవర్లు సముద్రంలోపల మునిగి వీడియో తీసినట్లుగా చూపించారు. ఈ వీడియోలో వారు ఒక పెద్ద విగ్రహాన్ని చూపిస్తూ, అది హిందూ ధర్మంలోని శ్రీకృష్ణుడి విగ్రహం అని ప్రచారం చేస్తున్నారు. అంతేకాదు, ఇండోనేషియాలోని బాలి ద్వీపం దగ్గర సముద్రంలో శాస్త్రవేత్తల బృందం దీన్ని కనుగొందని, ఈ విగ్రహం 5,000 సంవత్సరాల కంటే పాతది అని కొందరు యూజర్లు పెద్ద ఎత్తున షేర్ చేస్తున్నారు.

నిజ నిర్ధారణ (ఫ్యాక్ట్ చెక్) చేయగా, ఈ వైరల్ అవుతున్న వాదన పూర్తిగా అబద్ధం అని తేలింది. మా పరిశోధనలో, వైరల్ వీడియో నిజం కాదని, అది కృత్రిమ మేధస్సు (AI) సాంకేతికతను ఉపయోగించి సృష్టించబడినదని స్పష్టమైంది. AI ద్వారా రూపొందించిన ఈ వీడియోను యూజర్లు తప్పుదోవ పట్టించే కథనాలతో షేర్ చేస్తున్నారు. నిజం తెలుసుకోవడానికి, ఈ వైరల్ వీడియోలోని కీలకమైన ఫ్రేమ్‌లను తీసుకుని రివర్స్ ఇమేజ్ సెర్చ్ చేశారు. ఈ పరిశోధనలో, @mbaiarts అనే యూజర్ ఇన్‌స్టాగ్రామ్ ఖాతాలో ఈ వీడియో కనిపించింది. ఇది 2025 ఏప్రిల్ 9న పోస్ట్ చేయబడింది. ఆ యూజర్ తమ పోస్ట్‌లో, ఈ దృశ్యాలను కళాత్మక, సాంస్కృతిక కథ చెప్పడం కోసం AIతో సృష్టించినట్లు స్పష్టంగా పేర్కొన్నారు.

అంతేకాదు, వైరల్ వీడియో AI ద్వారా రూపొందించబడిందా లేదా అని తెలుసుకోవడానికి మేము AI వీడియో డిటెక్షన్ టూల్ 'హైవ్ మోడరేషన్ వెబ్‌సైట్'లో పరీక్షించగా.. ఈ టూల్ ఇచ్చిన రిపోర్ట్ ప్రకారం, ఈ వీడియోను కృత్రిమ మేధస్సు (AI) సహాయంతో రూపొందించారని స్పష్టమైంది. నివేదిక ప్రకారం, ఈ వీడియో 96% AI ద్వారా సృష్టించబడింది.

ఇక వైరల్ అవుతున్న వాదనకు సంబంధించి గూగుల్‌లో శోధించగా... "ఇండోనేషియాలోని బాలి సముద్రంలో శ్రీ మహావిష్ణు దేవాలయం" అనే కీవర్డ్‌లను ఉపయోగించి వెతికినా, ఏ ప్రముఖ వార్తా సంస్థ కానీ, విశ్వసనీయమైన వార్తా నివేదికలు కానీ ఈ వాదనకు మద్దతుగా ఎటువంటి ఆధారాలను ప్రచురించలేదు.

కాబట్టి, వైరల్ అవుతున్న వీడియో నిజం కాదని, అది కృత్రిమ మేధస్సు (AI) సాంకేతికతను ఉపయోగించి సృష్టించబడింది. యూజర్లు ఈ AI రూపొందించిన వీడియోను తప్పుదోవ పట్టించే వాదనలతో షేర్ చేస్తున్నారు. అటువంటి పోస్ట్‌ల పట్ల ప్రజలు చాలా జాగ్రత్తగా ఉండాలి.

ఇది మొదటిసారి కాదు, సముద్రం లోపల హిందూ దేవాలయం అని కృత్రిమ మేధస్సుతో సృష్టించిన వీడియో వైరల్ కావడం. గతంలో కూడా 'రామసేతు' అని నీటి అడుగున ఉన్న వీడియో ఒకటి బాగా వైరల్ అయింది. ఆ సమయంలో కూడా ఫ్యాక్ట్ చెక్ నిర్వహించి అది నకిలీదని స్పష్టం చేసింది. ఇలాంటి తప్పుడు సమాచారం పట్ల ఎప్పుడూ అప్రమత్తంగా ఉండాలి.