కొంపముంచిన సోషల్ మీడియా.. నగరంలో ఏకంగా 150 పెళ్లిళ్లు క్యాన్సిల్

దిశ, వెబ్‌డెస్క్: వెయ్యి అబద్ధాలు ఆడైనా సరే ఒక పెళ్లి చేయాలన్నది నానుడి. కానీ.. అందులో ఒక్క నిజం తెలిసినా పెళ్లి ఆగిపోతుంది. ముక్కు, ముఖం పరిచయం లేని కుటుంబాలు ఈ పెళ్లితోనే బంధుత్వంగా మారుతాయి. కానీ.. ఇటీవల ఓ నగరంలో సోషల్ మీడియా కారణంగా జంటల మధ్య మనస్పర్థలు రావడంతో 40 రోజుల్లో 150కి పైగా పెళ్లిళ్లు రద్దయ్యాయి. మధ్యప్రదేశ్ లోని ఇండోర్లో ఈ ఘటనలు వెలుగులోకి వచ్చాయి.

చిన్నపిల్లల నుంచి పండుముసలి వరకూ సోషల్ మీడియాకు బానిసలవుతున్నారు. అవసరం లేకపోయినా ఆ మత్తులో మునిగి తేలుతున్నారు. ఈ సోషల్ మీడియానే పెళ్లి చేసుకునే జంటల పాలిట శాపంగా మారింది. సోషల్ మీడియాలో వధువు లేదా వరుడు చేసిన పోస్టులే అందుకు కారణం కావడం గమనార్హం.

ఇటీవల ఇండోర్ - గుజరాత్ కు చెందిన జంట ప్రీ వెడ్డింగ్ షూట్ జరుపుకుంది. ఈ షూట్ ను అమ్మాయి తన సోషల్ మీడియా అకౌంట్లో పోస్ట్ చేసింది. దీనిపై ఇద్దరి మధ్య గొడవ జరిగింది. ఆపై ఆ గొడవ చిలికి చిలికి గాలి వానలా మారడంతో మ్యారేజ్ క్యాన్సిల్ చేసుకున్నారు. 60-70 శాతం పెళ్లిళ్లు ఓల్డ్ ఫ్రెండ్స్ కు సంబంధించిన పోస్టులు చేయడం, గతంలో చేసిన పోస్టులు కారణంగా రద్దయ్యాయని ఓ హిందీ దినపత్రిక నిర్వహించిన సర్వేలో వెల్లడయింది. దీంతో పెళ్లి కావలసిన యువతీ యువకులు జాగ్రత్త పడుతున్నారు. సోషల్ మీడియాలో ఫ్రెండ్స్ కు సంబంధించిన పోస్టుల్ని డిలీట్ చేస్తున్నారు.