ఆ తేలు విషం.. గ్యాలన్‌కు 39 మిలియన్ డాలర్లు

137

దిశ, వెబ్‌డెస్క్: పాముల్లో.. అన్ని పాములు విషపూరితమైనవి కానట్లే, తేళ్లలో కూడా కొన్ని మాత్రమే విషాన్ని కలిగి ఉంటాయి. ఇక ప్రపంచంలోనే అత్యంత విషపూరితమైన తేళ్లలో ‘డెత్ స్టాకర్’ స్కార్పియన్ ఒకటి. అంతేకాదు దీని విషం కూడా అత్యంత ఖరీదైంది. క్లినికల్ ట్రయల్స్‌లో ఎంతో ఉపయోగపడే ఈ విషం.. ఒక్కో గ్యాలన్‌కు 39 మిలియన్ డాలర్లు (రూ. 2,86,17,96,600/-).

డెత్ స్టాకర్ విషం.. పెప్టైడ్ క్లోరోటాక్సిన్స్‌ను కలిగి ఉండగా, ఈ టాక్సిన్స్ ఉపయోగించి హ్యుమన్ బ్రెయిన్ ట్యూమర్స్‌కు చికిత్స అందించవచ్చు. అంతేకాదు ఇన్సులిన్ నియంత్రించడంలో, డయాబెటిస్‌ను తగ్గించడంలోనూ ఇది సమర్థవంతంగా పనిచేస్తుంది. ఇవేకాక అనేక వైద్యచికిత్సలు, పరిశోధనల్లో ఉపయోగించడం వల్ల ఈ విషానికి అధిక డిమాండ్ ఏర్పడింది. అందుకే ఈ విషం కోసం రీసెర్చ్ లేబొరేటరీలు ఎంతైనా చెల్లించడానికి సిద్ధంగా ఉంటాయి. ఒక అడల్ట్ డెత్ స్టాకర్ ఒకసారి 2 మిల్లీగ్రాములు విషాన్ని మాత్రమే ప్రొడ్యూస్ చేస్తుండగా, మళ్లీ దాంట్లో విషం ఉత్పత్తి కావడానికి 2 నుంచి 3 వారాల సమయం పడుతుంది. ఈ లెక్కన ఓ గ్యాలన్ విషం కావాలంటే.. ఎన్ని రోజులు పడుతుందో అర్థం చేసుకోవచ్చు. పైగా ఈ జాతికి చెందిన తేళ్లు తక్కువ సంఖ్యలోనే ఉండటం, వైద్యశాస్త్రంలో ఎంతో ఉపయోగపడుతుండటం వల్లే మార్కెట్‌లో దీని విలువ ఒక గ్యాలన్‌కు 39 మిలియన్ డాలర్లుగా ఉంది.

అయితే ‘డెత్ స్టాకర్’ అత్యంత విషపూరితమైన తేలు అయినప్పటికీ, ఆరోగ్యవంతుడైన ఓ మనిషిని చంపేంత ప్రాణాంతకమైతే కాదు. అయితే తక్కువ రోగనిరోధక శక్తి, వీక్ హార్ట్ ఉన్నవారితో పాటు చిన్నపిల్లలు, వృద్ధులకు మాత్రం దీనివల్ల ప్రమాదమే. తేనెటీగ కుట్టినప్పటితో పోలిస్తే, ఈ తేలు కుట్టడం వల్ల అంతకు 100 రెట్ల బాధ అధికంగా ఉంటుంది. వీటిని ఇంట్లో పెంచుకోవాలంటే.. ప్రత్యేక లైసెన్స్ అవసరం కానుండగా, కొన్ని దేశాల్లో మాత్రం ఇంట్లో పెంచుకోవడం చట్టవిరుద్ధం.

గల్లీ టూ గ్లోబల్ అప్డేట్స్.. రంగులు మారే రాజకీయాలపై ఆసక్తికర విశ్లేషణలు.. దమ్మున్న వార్తలు.. ఎప్పటికప్పుడు.. వాట్సాప్ ద్వారా పొందాలంటే.. మా నెంబ‌ర్‌ +91 88864 24242 ను సేవ్ చేసుకొని, "START" అని వాట్సాప్ ద్వారా మెసేజ్ పంపండి..