Rain Alert : రెండు రోజులు వర్షాలు

దిశ, వెబ్ డెస్క్ : తెలంగాణ రాష్ట్రంలో గత వారం రోజులుగా విచిత్రమైన వాతావరణ పరిస్థితులు నెలకొన్నాయి. పగటిపూట ఎండలు మండిపోతుంటే, సాయంత్రం అయ్యేసరికి ఒక్కసారిగా వాతావరణం చల్లబడి ఈదురు గాలులు, పిడుగులతో కూడిన వర్షాలు కురుస్తున్నాయి. ఈ విభిన్న వాతావరణ మార్పులపై హైదరాబాద్ వాతావరణ కేంద్రం (HMD) కీలక ప్రకటన విడుదల చేసింది.

మరో రెండు రోజులు వర్షాలు - యెల్లో అలర్ట్ జారీ

రాష్ట్రంలో రానున్న 48 గంటల్లో ఉరుములు, మెరుపులతో కూడిన వర్షాలు కురిసే అవకాశం ఉందని అధికారులు తెలిపారు. ఈ మేరకు పలు జిల్లాలకు 'యెల్లో అలర్ట్' జారీ చేశారు. ముఖ్యంగా ఆదిలాబాద్, మంచిర్యాల, జయశంకర్ భూపాలపల్లి, ములుగు, భద్రాద్రి కొత్తగూడెం, ఖమ్మం, నల్గొండ, సూర్యాపేట జిల్లాలతో పాటు రాజధాని హైదరాబాద్‌లోనూ వర్షాలు పడే అవకాశం ఉంది. గంటకు 30 నుండి 40 కిలోమీటర్ల వేగంతో బలమైన ఈదురు గాలులు వీస్తాయని, ప్రజలు పిడుగుల పట్ల అప్రమత్తంగా ఉండాలని హెచ్చరించారు.

అగ్నిగుండంలా పగటి ఉష్ణోగ్రతలు

వర్షాలు పడుతున్నప్పటికీ పగటి ఉష్ణోగ్రతల్లో ఎలాంటి మార్పులు ఉండవని HMD పేర్కొంది. మధ్యాహ్నం వరకు ఎండ తీవ్రత సాధారణం కంటే ఎక్కువగా ఉంటోంది. వర్షం పడటానికి ముందు వాతావరణంలో తేమ పెరిగి తీవ్రమైన ఉక్కపోత వేధిస్తోంది. రానున్న రెండు రోజుల తర్వాత వర్షాలు తగ్గుముఖం పడతాయని, ఆ తర్వాత ఎండల తీవ్రత మరింత పెరిగి ఉష్ణోగ్రతలు 43 నుండి 45 డిగ్రీల వరకు చేరుకునే అవకాశం ఉందని వాతావరణ శాఖ హెచ్చరించింది.