సీపీ చేతుల మీదుగా హుజురాబాద్ పోలీసులకు 'ఉత్తమ సేవా' ప్రశంసా పత్రాలు
విధుల పట్ల అంకితభావంతో ఉత్తమ సేవలు అందించిన హుజురాబాద్ పోలీసులకు ఉన్నతాధికారుల నుంచి అరుదైన గుర్తింపు లభించింది.
దిశ, హుజురాబాద్ రూరల్ : విధుల పట్ల అంకితభావంతో ఉత్తమ సేవలు అందించిన హుజురాబాద్ పోలీసులకు ఉన్నతాధికారుల నుంచి అరుదైన గుర్తింపు లభించింది. కరీంనగర్ పోలీస్ కమిషనరేట్ పరిధిలో ప్రతిభ కనబరిచిన పోలీసు సిబ్బందికి అందించే **"ఉత్తమ సేవా ప్రశంసా పత్రాలు"** హుజురాబాద్ పోలీస్ స్టేషన్లో విధులు నిర్వహిస్తున్న హెడ్ కానిస్టేబుల్ రాజేశ్వరరావు, కానిస్టేబుల్ మహేందర్కు ప్రదానం చేశారు. కరీంనగర్ పోలీస్ కమిషనర్ (సీపీ) గౌస్ ఆలం చేతుల మీదుగా వారు ఈ గుడ్ సర్వీస్ సర్టిఫికెట్లను అందుకున్నారు. శాంతిభద్రతల పరిరక్షణ, విధి నిర్వహణలో కనబరిచిన ప్రతిభ, కర్తవ్యనిర్వహణలో అంకితభావాన్ని గుర్తిస్తూ ఈ ప్రశంసా పత్రాలను అందజేశారు.
ఈ సందర్భంగా సీపీ గౌస్ ఆలం అవార్డు గ్రహీతలను అభినందిస్తూ, ఇదే నిబద్ధతతో భవిష్యత్తులోనూ ప్రజలకు సేవలందించి పోలీసు శాఖకు మరింత మంచి పేరు తీసుకురావాలని ఆకాంక్షించారు. సీపీ చేతుల మీదుగా ప్రశంసా పత్రాలు అందుకున్న హెడ్ కానిస్టేబుల్ రాజేశ్వరరావు, కానిస్టేబుల్ మహేందర్లకు స్థానిక పోలీసు అధికారులు, సహచర సిబ్బంది, ప్రజాప్రతినిధులు, పట్టణ ప్రముఖులు అభినందనలు తెలిపారు.
