అమెరికా-భారత్ ట్రేడ్ ఒప్పందంతో మందుబాబులకు కిక్కు.. భారీగా తగ్గనున్న మద్యం ధరలు

దిశ, వెబ్ డెస్క్: భారత్, అమెరికా మధ్య సుదీర్ఘ చర్చల అనంతరం ప్రతిష్టాత్మ ట్రేడ్ డీల్ (Trade Deal) కుదిరిన విషయం తెలిసిందే. ఈ డీల్ లో భాగంగా భారత ప్రభుత్వం అమెరికా నుంచి భారత్‌లోకి దిగుమతి అయ్యే వస్తువులపై భారత్ సుంకాలను తగ్గించింది. దీంతో దేశంలోని మద్యం ప్రియులకు తీపి కబురు అందింది. అగ్రరాజ్యం అమెరికా నుంచి దిగుమతి అయ్యే ప్రీమియం మద్యం (Spirits), వైన్ పై ఉన్న సుంకాలను గణనీయంగా తగ్గించేందుకు భారత ప్రభుత్వం అంగీకరించింది. ప్రస్తుతం విదేశీ మద్యంపై ఉన్న 150 శాతం రక్షణ సుంకాన్ని (Protectionist Duty) ఈ ఒప్పందం ద్వారా భారీగా తగ్గించనున్నారు. కొత్త నిబంధనల ప్రకారం, అమెరికన్ విస్కీలు, వైన్లపై పన్నులు 30 నుంచి 40 శాతానికి పరిమితం అయ్యే అవకాశం ఉంది. దీనివల్ల గతంలో రూ. 4,500 వరకు పలికిన ప్రముఖ బ్రాండ్ల ధరలు ఇప్పుడు రూ. 2,500 నుంచి రూ. 3,000 లోపుకే అందుబాటులోకి వచ్చే అవకాశం ఉందని మార్కెట్ విశ్లేషకులు అంచనా వేస్తున్నారు.

అలాగే మద్యం మాత్రమే కాకుండా, ఈ ఒప్పందం వల్ల ఆటోమొబైల్ (Automobile), ఇతర పారిశ్రామిక రంగాల్లో కీలక మార్పులు రానున్నాయి. అమెరికా నుండి దిగుమతి అయ్యే కార్లు, బైక్‌లపై 'కోటా ఆధారిత' సుంకాల తగ్గింపును భారత్ ప్రకటించింది. దీనివల్ల హార్లే డేవిడ్సన్ వంటి లగ్జరీ బైక్‌లు, అమెరికన్ బ్రాండ్ల వాహనాల ధరలు తగ్గుతున్నాయి. ప్రతిగా, అమెరికా కూడా భారత్ నుంచి ఎగుమతి అయ్యే సుమారు 31 బిలియన్ డాలర్ల విలువైన వస్తువులపై పన్నులను 50 శాతం నుంచి ఏకంగా 18 శాతానికి తగ్గించింది. దీనివల్ల అమెరికా మార్కెట్‌లో భారతీయ వస్త్రాలు, తోలు ఉత్పత్తులు, హస్తకళా వస్తువులకు విపరీతమైన డిమాండ్ పెరిగి, భారత ఎగుమతిదారులకు భారీ లాభాలు చేకూరనున్నాయి.

ఎన్నో చర్చల తర్వాత భారత్, అమెరికా దేశాల మధ్య కుదిరిన ద్వైపాక్షిక ఒప్పందం వల్ల ఇరు దేశాల ఆర్థిక వ్యవస్థలకు భారీ ప్రయోజనం చేకూరనుంది. రాబోయే ఐదేళ్లలో భారత్ అమెరికా నుండి సుమారు 500 బిలియన్ డాలర్ల విలువైన ఇంధనం, సాంకేతిక పరికరాలు, విమాన భాగాలను కొనుగోలు చేయనుంది. ఈ ఒప్పందంతో అటు విదేశీ మద్యం ధరలు తగ్గి సామాన్యులకు ఉపశమనం లభించడంతో పాటు, ఇటు భారతీయ ఉత్పత్తులకు అంతర్జాతీయ స్థాయిలో గట్టి పోటీ నిచ్చే సామర్థ్యం లభించింది. మొత్తానికి ఈ 'ట్రేడ్ డీల్' ఇరు దేశాల మధ్య దౌత్యపరమైన, ఆర్థిక పరమైన బంధాన్ని సరికొత్త శిఖరాలకు తీసుకెళ్లేలా ఉంది.