కాసేపట్లో ఇరాన్ బూడిద అవుతుంది : అమెరికా హెచ్చరిక

దిశ, వెబ్ డెస్క్ : మధ్యప్రాచ్యంలో యుద్ధం భీకర స్థాయికి చేరుకున్న నేపథ్యంలో అమెరికా ఇరాన్ కు మరోసారి తీవ్ర హెచ్చరికలు జారీ చేసింది. అమెరికా రక్షణ కార్యదర్శి పీట్ హెగ్సెత్ (Pete Hegseth) చేసిన తాజా ప్రకటన ప్రకారం.. ఇరాన్‌పై ఎన్నడూ లేనంత స్థాయిలో దాడులు చేయడానికి అమెరికా సైన్యం సర్వం సిద్ధం చేసుకుందని పేర్కొన్నారు. తాము అనుకున్న సమయానికే ఇరాన్‌తో యుద్ధాన్ని ముగిస్తామని ఆయన ధీమా వ్యక్తం చేశారు. అమెరికా అధ్యక్షుడు ట్రంప్ హెచ్చరికలను ఇరాన్ కొత్త సుప్రీం లీడర్ మొజ్తబా ఖమేనీ (Mojtaba Khamenei) అర్థం చేసుకుంటే ఆ దేశానికి మంచిదని పీట్ హెగ్సెత్ సూచించారు.

మరోవైపు మిడిల్ ఈస్ట్ దేశాల్లో క్షేత్రస్థాయిలో పరిస్థితులు మరింత ఆందోళనకరంగా మారాయి. యునైటెడ్ అరబ్ ఎమిరేట్స్ (UAE) లోని అతిపెద్దదైన రువైస్ (Ruwais) ఆయిల్ రిఫైనరీపై భారీ డ్రోన్ దాడి జరిగింది. ఈ దాడి కారణంగా రిఫైనరీలో మంటలు చెలరేగడంతో భారీ నష్టం వాటిల్లడం వల్ల దానిని తాత్కాలికంగా మూసివేస్తున్నట్లు అధికారులు ప్రకటించారు. ఈ పరిణామం ప్రపంచ ఇంధన సరఫరాపై తక్షణ ప్రభావాన్ని చూపుతోంది. ఇరాన్ మద్దతు ఉన్న గ్రూపులు ఈ దాడికి పాల్పడి ఉండవచ్చని అనుమానిస్తున్నారు.

'ఆపరేషన్ ఎపిక్ ఫ్యూరీ' లో భాగంగా అమెరికా ఇప్పటికే ఇరాన్‌లోని 1,700 కంటే ఎక్కువ కీలక లక్ష్యాలను ధ్వంసం చేసింది. వీటిలో ఇరాన్ నావికాదళం, బాలిస్టిక్ మిస్సైల్ సైట్లు ఉన్నట్టు సమాచారం. ఇరాన్ లోపల ఇంటర్నెట్ బ్లాక్‌అవుట్ కొనసాగుతుండగా, యుఏఈ రిఫైనరీపై జరిగిన దాడితో అంతర్జాతీయ మార్కెట్‌లో చమురు ధరలు ఒక్కసారిగా పెరిగాయి. అమెరికా "నిర్మొహమాటంగా మరియు విధ్వంసకరంగా" దాడులు కొనసాగిస్తూ.. విజయం సాధిస్తోందని హెగ్సెత్ పేర్కొన్నప్పటికీ.. ఇరుపక్షాల దాడులతో మధ్యప్రాచ్యం మొత్తం నిప్పుల కొలిమిలా మారింది.