విజయ్ ‘జననాయగన్’కు లైన్ క్లియర్.. హైకోర్టులో పిటిషన్ ఉపసంహరణకు సిద్ధమైన కేవీఎన్ ప్రొడక్షన్స్

దిశ, వెబ్ డెస్క్: తమిళ దళపతి, హీరో విజయ్ ‘జననాయగన్’ సినిమాకు లైన్ క్లియర్ అయింది. తమిళనాడు రాజకీయాల్లోకి ప్రత్యక్షంగా వెళ్తున్న హీరో విజయ్ ప్రస్థానానికి ముందు నటిస్తున్న చివరి చిత్రం కావడంతో 'జననాయగన్' పై దేశవ్యాప్తంగా భారీ అంచనాలు ఉన్నాయి. అయితే, గత కొంతకాలంగా ఈ సినిమా టైటిల్ వివాదం మద్రాస్ హైకోర్టు మెట్లెక్కిన సంగతి తెలిసిందే. తాజాగా ఈ వివాదానికి ముగింపు పలుకుతూ నిర్మాణ సంస్థ కేవీఎన్ ప్రొడక్షన్స్ కీలక నిర్ణయం తీసుకుంది.

ఇంతకి వివాదం ఏమిటి..?

హీరో విజయ్ నటించిన చివరి చిత్రం 'జననాయగన్' విడుదలకు సిద్దమైన క్రమంలో.. ఆ టైటిల్ పై హక్కులు తమవేనంటూ కొందరు స్వతంత్ర నిర్మాతలు, రచయితలు అభ్యంతరం వ్యక్తం చేశారు. గతంలో ఇదే పేరుతో సినిమా తీయాలని భావించిన మరో చిన్న నిర్మాణ సంస్థతో కేవీఎన్ ప్రొడక్షన్స్‌కు వివాదం తలెత్తింది. దీంతో టైటిల్ రిజిస్ట్రేషన్, విడుదలకు సంబంధించి మద్రాస్ హైకోర్టులో రిట్ పిటిషన్ దాఖలైంది. విజయ్ పొలిటికల్ ఎంట్రీకి ఈ టైటిల్ చాలా పవర్‌ఫుల్‌గా ఉంటుందని భావించిన తరుణంలో ఈ న్యాయపరమైన అడ్డంకులు చిత్ర యూనిట్‌ను ఆందోళనకు గురిచేశాయి.

పిటిషన్ ఉపసంహరణ

తాజాగా తమిళ ఇండస్ట్రీ నుంచి అందుతున్న సమాచారం ప్రకారం.. కేవీఎన్ ప్రొడక్షన్స్ ఈ రిట్ పిటిషన్‌ను వెనక్కి తీసుకోవాలని నిర్ణయించుకుంది. ఈ మేరకు నిర్మాణ సంస్థ తరపు న్యాయవాది విజయన్ సుబ్రమణియన్ హైకోర్టు రిజిస్టర్‌కి అధికారిక లేఖ సమర్పించారు. ఈ పిటిషన్ ఉపసంహరణపై ఫిబ్రవరి 10, 2026న జస్టిస్ పి.టి. ఆశా సమక్షంలో విచారణ జరగనుంది. ఈ వివాదాన్ని కోర్టు వెలుపల పరిష్కరించుకోవడం (Out-of-court settlement), టైటిల్ విషయంలో క్లియరెన్స్ రావడంతోనే ఈ నిర్ణయం తీసుకున్నట్లు ఇండస్ట్రీ వర్గాల్లో టాక్ నడుస్తోంది.

విజయ్ అభిమానుల్లో ఫుల్ జోష్

తాజా పరిణామాలతో.. రాజకీయాల్లోకి వెళ్లబోయే ముందు విజయ్ చేస్తున్న ఈ సినిమాపై ఇప్పటికే ఎన్నో రూమర్లు వచ్చాయి. సినిమా షూటింగ్ ఆగిపోయిందని, టైటిల్ మారుస్తారని ప్రచారం జరిగింది. కానీ ఇప్పుడు హైకోర్టులో పిటిషన్ ఉపసంహరణ నిర్ణయంతో ఈ సినిమాకు ఉన్న ప్రధాన అడ్డంకి తొలగిపోయినట్లయింది. దీంతో ఈ సినిమాపై భారీ అంచనాలు పెట్టుకున్న హీరో విజయ్ అభిమానులు ఫుల్ జోష్‌లో కనిపిస్తున్నారు.