ఫిఫా వరల్డ్ కప్ : సెమీ ఫైనల్లోకి స్పెయిన్

దిశ, వెబ్ డెస్క్ : ఫిఫా ప్రపంచకప్ (FIFA World Cup) లో సెమీఫైనల్స్ బెర్త్‌ల రేసు అత్యంత ఉత్కంఠభరితంగా మారింది. శనివారం జరిగిన మరో హై-ప్రొఫైల్ క్వార్టర్ ఫైనల్ మ్యాచ్‌లో స్పెయిన్ జట్టు 2-1 గోల్స్ తేడాతో బెల్జియంను చిత్తు చేసి సెమీఫైనల్లోకి దూసుకెళ్లింది. ఈ విజయంతో మంగళవారం డాలస్‌లో జరగబోయే మొదటి సెమీఫైనల్‌లో ఫ్రాన్స్‌తో తలపడేందుకు స్పెయిన్ సిద్ధమైంది.

మెరీనో లేట్ మేజిక్.. స్పెయిన్ విక్టరీ

మ్యాచ్ ప్రారంభం నుంచే ఇరు జట్లు హోరాహోరీగా తలపడ్డాయి. మ్యాచ్ 30వ నిమిషంలో స్పెయిన్ స్టార్ ప్లేయర్ ఫాబియన్ రుయిజ్ అద్భుతమైన ఫీల్డ్ గోల్‌తో తన జట్టుకు 1-0 ఆధిక్యాన్ని అందించాడు. అయితే బెల్జియం కూడా ఏమాత్రం తగ్గకుండా పోరాడింది. 41వ నిమిషంలో ఆ జట్టు ప్లేయర్ చార్లెస్ డి కెటెలార్ మెరుపు గోల్‌తో స్కోరును 1-1తో సమం చేశాడు. దీనితో ఫస్టాఫ్ ముగిసేసరికి ఇరు జట్లు సమానంగా నిలిచాయి. సెకండాఫ్‌లో ఇరు జట్ల డిఫెండర్లు గట్టిగా నిలబడటంతో మ్యాచ్ ఎక్స్‌ట్రా టైమ్‌కు వెళ్తుందని భావించిన తరుణంలో.. 88వ నిమిషంలో స్పెయిన్ మిడ్‌ఫీల్డర్ మికేల్ మెరీనో లీడ్ గోల్ కొట్టి బెల్జియం ఆశలపై నీళ్లు చల్లాడు. చివరి నిమిషాల్లో బెల్జియం ఎంత ప్రయత్నించినా స్పెయిన్ రక్షణ శ్రేణిని ఛేదించలేకపోయింది.

సెమీఫైనల్స్ డ్రీమ్ మ్యాచ్

క్వార్టర్స్ ముగిసేసరికి లీగ్ సమీకరణాలు ఆసక్తికరంగా మారాయి. మొరాకోను 2-0తో ఓడించిన ఫ్రాన్స్ తో.. స్పెయిన్ జట్టు సెమీస్ లో ఢీకొనబోతోంది. ఇంటర్నేషనల్ ఫుట్‌బాల్‌లో అత్యంత బలమైన ప్రత్యర్థులుగా ఉన్న స్పెయిన్ - ఫ్రాన్స్ జట్లు ఫైనల్ బెర్త్ కోసం తలపడనుండటంతో ఫుట్‌బాల్ ప్రేమికుల్లో ఇప్పుడే ప్రపంచకప్ ఫీవర్ పీక్స్‌కు చేరింది.