అయ్యో పాపం.. ఈ సీనియర్ నటి దయనీయ పరిస్థితి చూసారా?

దిశ, వెబ్ డెస్క్ : తెలుగు సినీ పరిశ్రమలో క్యారెక్టర్ ఆర్టిస్ట్‌గా, హాస్యనటిగా వందలాది చిత్రాల్లో నటించి ప్రేక్షకులను మెప్పించిన సీనియర్ నటి పావలా శ్యామల దుస్థితి చూసి చిత్రసీమ దిగ్భ్రాంతికి గురైంది. తీవ్రమైన ఆర్థిక ఇబ్బందులు, అనారోగ్య సమస్యలతో సతమతమవుతున్న ఆమె.. చివరికి తన కుమార్తెతో కలిసి అనాథగా ఆసుపత్రి ఆవరణకు చేరడం స్థానికంగా కలకలం రేపింది.

ఛాతీ ఆసుపత్రి ఆవరణలో వదిలేసిన గుర్తుతెలియని వ్యక్తులు

గురువారం ఉదయం కొందరు గుర్తుతెలియని వ్యక్తులు పావలా శ్యామలతో పాటు ఆమె కుమార్తె మాధవిని ఎర్రగడ్డలోని ప్రభుత్వ ఛాతీ ఆసుపత్రి (Chest Hospital) ఆవరణలో వదిలి వెళ్లారు. అక్కడ దీనస్థితిలో ఉన్న ఆమెను గుర్తించిన ఆసుపత్రి సిబ్బంది వెంటనే అధికారులకు సమాచారం అందించారు. ఆసుపత్రి సూపరింటెండెంట్ డాక్టర్ శ్రవణ్‌కుమార్ ఆదేశాల మేరకు వైద్యులు వారిద్దరికీ క్షయ (TB) పరీక్షలు నిర్వహించారు.

ఉస్మానియాకు తరలింపు.. తిరిగి ఎర్రగడ్డకు రాక

పరీక్షల్లో వారికి క్షయ వ్యాధి లేదని తేలినప్పటికీ, ఇతర తీవ్ర వయోధిక, అనారోగ్య సమస్యలు ఉండటంతో మెరుగైన చికిత్స కోసం వారిని ఉస్మానియా జనరల్ ఆసుపత్రికి తరలించారు. అక్కడి వైద్యులు వారిని చేర్చుకుని పరీక్షలు ప్రారంభించారు. అయితే, తాము ఉస్మానియా ఆసుపత్రి వాతావరణంలో ఉండలేకపోతున్నామంటూ వారు సాయంత్రానికి తిరిగి ఎర్రగడ్డ ఛాతీ ఆసుపత్రికే చేరుకున్నారు. దీనితో మానవీయ కోణంలో స్పందించిన అధికారులు వారిని ఆసుపత్రిలోనే ఉంచి, బోరబండ పోలీసులకు సమాచారం ఇచ్చారు.

పోలీసుల సహాయంతో అనాథాశ్రమానికి

శ్యామల, ఆమె కుమార్తె పరిస్థితిని గమనించిన పోలీసులు, ఆసుపత్రి అధికారులు వారికి శాశ్వత ఆశ్రయం కల్పించాలని నిర్ణయించారు. శుక్రవారం వారిద్దరినీ పోలీసుల ప్రత్యేక రక్షణ నడుమ నగరంలోని ఒక అనాథాశ్రమానికి తరలించారు. గతంలోనే పావలా శ్యామల ఆర్థిక సాయం కోసం పలువురు సినీ ప్రముఖులను, ప్రభుత్వాన్ని ఆశ్రయించారు. 'మా' (MAA) అసోసియేషన్ మరియు కొంతమంది దాతలు అప్పట్లో ఆర్థికంగా ఆదుకున్నప్పటికీ, దీర్ఘకాలిక అనారోగ్య సమస్యలు, నిలకడలేని జీవనం కారణంగా ఆమె పరిస్థితి మళ్లీ మొదటికి వచ్చింది. ఒకప్పుడు వెండితెరపై నవ్వించిన నటి.. నేడు ఇలాంటి పరిస్థితిలో అనాథాశ్రమానికి చేరడం పట్ల సినీ అభిమానులు, నెటిజన్లు సామాజిక మాధ్యమాల్లో ఆవేదన వ్యక్తం చేస్తున్నారు.