వెయ్యి డ్రోన్లతో ఉక్రెయిన్ పై రష్యా భారీ ఎయిర్ అటాక్

దిశ, వెబ్ డెస్క్ : ఉక్రెయిన్ - రష్యా మధ్య జరుగుతున్న యుద్ధం అత్యంత విధ్వంసకర దశకు చేరుకుంది. గడిచిన గత 24 గంటల్లో (మార్చి 23 సాయంత్రం నుండి మార్చి 24 సాయంత్రం వరకు) రష్యా ఏకంగా 1,000 డ్రోన్లతో ఉక్రెయిన్ గగనతలంపై దాడికి దిగింది. యుద్ధం ప్రారంభమైనప్పటి నుండి ఒక్కరోజులో జరిగిన అతిపెద్ద డ్రోన్ దాడి ఇదేనని ఉక్రెయిన్ రక్షణ వర్గాలు ధృవీకరించాయి. సాధారణంగా రాత్రి సమయాల్లో దాడులు చేసే రష్యా, ఈసారి పగలు కూడా వందలాది డ్రోన్లను ప్రయోగించడం అంతర్జాతీయ సమాజాన్ని విస్మయానికి గురిచేస్తోంది. ఇరాన్ తయారీ షాహెద్ డ్రోన్లతో పాటు రష్యా సొంతంగా అభివృద్ధి చేసిన అత్యాధునిక క్షిపణులు ఈ దాడిలో ప్రయోగించినట్టు సమాచారం.

రాత్రి, పగలు విరామం లేకుండా దాడులు

సోమవారం రాత్రివేళ 392 డ్రోన్లు, 34 క్షిపణులతో ప్రారంభమైన విధ్వంసం.. మంగళవారం పగటిపూట మరో 556 డ్రోన్ల దాడితో కొనసాగింది. ఉక్రెయిన్ అంతటా సుమారు 550 ప్రాంతాలను లక్ష్యంగా చేసుకుని ఈ దాడులు జరిగాయి. ఉక్రెయిన్ వైమానిక దళం (Air Force) అత్యంత చాకచక్యంగా వ్యవహరించి 541 డ్రోన్లను గాలిలోనే కూల్చివేసినప్పటికీ, మిగిలినవి నివాస ప్రాంతాలపై ఆసుపత్రులపై పడి భారీ నష్టాన్ని కలిగించాయి. ఇవానో-ఫ్రాంకివ్స్క్ ప్రసూతి ఆసుపత్రి సమీపంలో జరిగిన దాడిలో ఒక సైనికుడు, అతని 15 ఏళ్ల కుమార్తె మరణించారు. అప్పుడే పుట్టిన తన బిడ్డను, భార్యను చూడటానికి ఆసుపత్రికి వెళ్తుండగా ఈ ఘోరం జరగడం ఉక్రెయిన్ ప్రజలను శోకసంద్రంలో ముంచెత్తింది. ఎల్వివ్ నగరంలోని యునెస్కో గుర్తించిన 17వ శతాబ్దపు చారిత్రక చర్చి కూడా ఈ దాడుల్లో పాక్షికంగా దెబ్బతిన్నట్లు సమాచారం.

జెలెన్‌స్కీ ఆగ్రహం

ఈ వినాశనంపై ఉక్రెయిన్ అధ్యక్షుడు వోలోడిమిర్ జెలెన్‌స్కీ తీవ్రంగా స్పందించారు. రష్యాకు యుద్ధాన్ని ముగించాలనే ఆలోచన లేదని, వారి లక్ష్యం కేవలం విధ్వంసమేనని ఆయన మండిపడ్డారు. మాస్కోపై అంతర్జాతీయ సమాజం మరిన్ని కఠిన ఆంక్షలు విధించాలని, ఉక్రెయిన్ గగనతలాన్ని కాపాడుకోవడానికి మరిన్ని అత్యాధునిక ఎయిర్ డిఫెన్స్ వ్యవస్థలు అవసరమని ఆయన పశ్చిమ దేశాలను కోరారు.

కువైట్ ఎయిర్పోర్ట్ మీద దాడి.. భారీగా ఎగసిపడుతున్న మంటలు