రూ. 16వేల కోట్ల ఆఫర్‌ను తిరస్కరించిన రాజస్థాన్‌ రాయల్స్!

దిశ, వెబ్ డెస్క్ : ఇండియన్ ప్రీమియర్ లీగ్(IPL) ఫ్రాంచైజీల విలువ ఆకాశాన్ని తాకుతోంది. జాతీయ మీడియా కథనాల ప్రకారం.. రాజస్థాన్ రాయల్స్ ఫ్రాంచైజీని కొనుగోలు చేసేందుకు యూఎస్-కెనడాకు చెందిన కొలంబియా పసిఫిక్ క్యాపిటల్ పార్టనర్స్ (CPCP) కన్సార్షియం ఏకంగా రూ. 16,000 కోట్ల (సుమారు $1.7 బిలియన్) భారీ ఆఫర్‌ను ప్రకటించింది. కేవలం రెండు వారాల్లోనే పూర్తి మొత్తాన్ని చెల్లిస్తామని నిషా సచ్‌దేవా, దేబ్‌జీత్ గుప్తా నేతృత్వంలోని ఈ ఇన్వెస్ట్‌మెంట్ ఫర్మ్ అత్యంత భారీ ఆఫర్ తో ముందుకు వచ్చినప్పటికీ, రాజస్థాన్ రాయల్స్ యాజమాన్యం ఈ ఆఫర్‌ను నిర్ద్వంద్వంగా తిరస్కరించింది. ఈ నిర్ణయం క్రీడా, వ్యాపార వర్గాల్లో పెద్ద చర్చకు దారితీసింది. ఈ ఆఫర్ తమ ఫ్రాంచైజీ యొక్క అసలైన లాంగ్-టర్మ్ వాల్యూను ప్రతిబింబించడం లేదని భావించి ఈ నిర్ణయం తీసుకున్నట్లు తెలుస్తోంది.

రిజెక్షన్ కారణం ఇదేనా!

ఈ రిజెక్షన్ వెనుక బలమైన వ్యూహాత్మక కారణాలు ఉన్నాయని విశ్లేషకులు అభిప్రాయపడుతున్నారు. రాజస్థాన్ రాయల్స్ యాజమాన్యం కేవలం డబ్బు కోసమే కాకుండా, ఫ్రాంచైజీకి ఉన్న గ్లోబల్ బ్రాండ్ వాల్యూ, భవిష్యత్తులో రాబోయే ఆదాయ వనరులను దృష్టిలో ఉంచుకుని మరింత మెరుగైన వాల్యుయేషన్ కోసం వేచి చూస్తోందని అంటున్నారు. ముఖ్యంగా డీల్ స్ట్రక్చర్, దాని అమలులో ఉన్న కొన్ని సాంకేతిక పరమైన సర్టెయింటీపై యాజమాన్యానికి కొన్ని సందేహాలు ఉండటం కూడా ఈ డీల్ క్యాన్సిల్ అవ్వడానికి ఒక కారణంగా కనిపిస్తోందని చెబుతున్నారు. ప్రస్తుతం రైన్ గ్రూప్ (Raine Group) ద్వారా అమ్మకపు ప్రక్రియ కొనసాగుతుండటంతో, ఇతర బిడ్డర్లు దీనికంటే ఎక్కువ మొత్తానికి బిడ్లు వేసే అవకాశం ఉందని, తద్వారా ఫ్రాంచైజీ విలువను మరింత పెంచవచ్చని ఓనర్లు భావిస్తున్నారు. ఈ పరిణామం 2026 ఐపీఎల్ సీజన్ ప్రారంభానికి ముందు లీగ్ యొక్క ఆర్థిక ముఖచిత్రాన్ని పూర్తిగా మార్చివేసింది.

ఇతర జట్లపై ప్రభావం

రాజస్థాన్ రాయల్స్ తీసుకున్న ఈ నిర్ణయం ఇతర ఐపీఎల్ జట్ల వాల్యుయేషన్లపై కూడా భారీ ప్రభావాన్ని చూపబోతోంది. ముఖ్యంగా ప్రస్తుతం అమ్మకానికి సిద్ధంగా ఉన్నట్లు ప్రచారం జరుగుతున్న రాయల్ ఛాలెంజర్స్ బెంగళూరు (RCB) వంటి ఫ్రాంచైజీల విలువ ఈ దెబ్బతో 15% కంటే ఎక్కువ ప్రీమియం పొందే అవకాశం ఉంది. ఆర్సీబీ విలువ ఇప్పుడు ఏకంగా $2 బిలియన్ల (సుమారు రూ. 18,000 కోట్ల పైచిలుకు) మార్కును సులభంగా దాటేస్తుందని ట్రేడ్ అనలిస్టులు అంచనా వేస్తున్నారు. కేవలం ఒక జట్టే రూ.16,000 కోట్ల ఆఫర్‌ను వద్దనుకుందంటే, ఐపీఎల్ అనేది ఇప్పుడు కేవలం ఒక క్రికెట్ లీగ్ మాత్రమే కాదు, ప్రపంచంలోనే అత్యంత విలువైన క్రీడా ఆస్తిగా అవతరించిందని స్పష్టమవుతోంది.