వింత అపాయింట్మెంట్.. రిటైర్మెంట్‌కు ముందు రోజు పోస్టింగ్‌ లెటర్‌!

దిశ, వెబ్ డెస్క్ : ప్రభుత్వ ఉద్యోగాల భర్తీ ప్రక్రియలో ఉండే తీవ్ర జాప్యం, అధికారుల ఉదాసీనత ఒక్కోసారి ఎంతటి విడ్డూరాలకు దారితీస్తుందో చెప్పడానికి జార్ఖండ్ రాష్ట్రంలో జరిగిన ఈ ఘటనే ఒక చక్కటి ఉదాహరణ. జార్ఖండ్ విద్యాశాఖలో ఒప్పంద ఉపాధ్యాయులు నియామక ప్రక్రియలో చోటుచేసుకున్న ఘోరమైన అలసత్వం ఇప్పుడు దేశవ్యాప్తంగా చర్చనీయాంశంగా మారింది. ఏకంగా ఒక అభ్యర్థికి తన రిటైర్మెంట్ వయసు వచ్చే దానికి కేవలం ఒక్క రోజు ముందు ప్రభుత్వ నియామక పత్రం (Posting Letter) అందగా.. మరో అభ్యర్థికి రిటైర్మెంట్ వయసు కూడా దాటిపోయిన తర్వాత ఉద్యోగ పత్రం జారీ కావడం అక్కడి వ్యవస్థల తీరుకు అద్దం పడుతోంది.

అయితే 2006 నుంచి ఒప్పంద ఉపాధ్యాయులుగా పనిచేస్తున్నవారు ఏళ్లుగా తమను పర్మినెంట్ చేయాలని పోరాటం చేస్తున్నారు. ఎట్టకేలకు ప్రభుత్వం స్పందించి ఈ నియామక ప్రక్రియను 2023 లో ప్రారంభించింది. అయితే, అత్యంత వేగంగా పూర్తి కావాల్సిన ఈ భర్తీ ప్రక్రియను అధికారులు ఏకంగా మూడేళ్ల పాటు సాగదీశారు. 2026 నాటికి కూడా ఈ నియామకాలు ఇంకా కొనసాగుతూనే ఉన్నాయి. ఈ సుదీర్ఘ కాలయాపన వల్ల నాడు ఆశతో దరఖాస్తు చేసుకున్న నిరుద్యోగుల వయసు ప్రస్తుతం 57 నుండి 58 ఏళ్లకు చేరింది. మూడేళ్ల పాటు ఫైళ్లను అటకెక్కించిన అధికారులు, తీరా ఇప్పుడు నియామక పత్రాలు జారీ చేసే సరికి అభ్యర్థులంతా తమ పదవీ విరమణ వయసుకు చేరుకోవడం గమనార్హం.

ఈ ప్రభుత్వ చోద్యంలో బాధితులుగా మారిన వారి వివరాలు చూస్తే జార్ఖండ్ విద్యాశాఖ వైఫల్యం స్పష్టమవుతుంది. జమ్తారా జిల్లాకు చెందిన నందలాల్‌ రవానీ అనే అభ్యర్థి 2006 నుంచి టీచర్ గా పనిచేస్తూ.. రెగ్యులరైజేషన్ కోసం సుదీర్ఘ కాలంగా ఎదురుచూడగా, ఆయనకు జార్ఖండ్ ప్రభుత్వ నిబంధనల ప్రకారం రిటైర్మెంట్‌ వయసైన 60 ఏళ్లు నిండడానికి కేవలం ఒక్క రోజు ముందు పోస్టింగ్ లెటర్ చేతికి అందింది. అంటే ఆయన కేవలం ఒక్క రోజు మాత్రమే ఉద్యోగం చేసి మరుసటి రోజు పదవీ విరమణ చేయాల్సి ఉంటుంది. ఇక పలాము ప్రాంతానికి చెందిన నియమ్‌ అన్సారీ అనే మరో అభ్యర్థి పరిస్థితి మరీ ఘోరం. ఈయనకు అసలు రిటైర్మెంట్ వయసు 60 ఏళ్లు పూర్తిగా దాటిపోయిన నెల రోజుల తర్వాత నియామక పత్రం జారీ చేశారు. ఈ విచిత్రమైన ఉదంతాలపై అభ్యర్థులు, విద్యావేత్తలు తీవ్ర ఆగ్రహం వ్యక్తం చేస్తున్నారు. నిరుద్యోగుల జీవితాలతో ఆడుకుంటున్న ఇలాంటి నియామక ప్రక్రియలపై ఉన్నత స్థాయి దర్యాప్తు జరపాలని డిమాండ్ చేస్తున్నారు.