'మిషన్ దృష్టి' విజయంపై ప్రధాని మోడీ ప్రశంసలు

దిశ, వెబ్ డెస్క్: భారత ప్రైవేట్ అంతరిక్ష రంగం ఒక అద్భుతమైన మైలురాయిని అధిగమించింది. గెలాక్సీ ఐ (GalaxEye) సంస్థ రూపొందించిన ప్రపంచంలోనే మొట్టమొదటి ఆప్టోసార్ (OptoSAR) ఇమేజింగ్ శాటిలైట్‌ 'మిషన్ దృష్టి' ప్రయోగం విజయవంతమైంది. ఈ చారిత్రాత్మక విజయం పట్ల ప్రధానమంత్రి నరేంద్ర మోడీ హర్షం వ్యక్తం చేశారు. భారతదేశంలో ప్రైవేటు రంగంలో నిర్మించిన అతిపెద్ద ఉపగ్రహం గా నిలిచిన ఈ మిషన్, దేశ అంతరిక్ష యాత్రలో ఒక కీలక ఘట్టమని ఆయన కొనియాడారు. ఉపరాష్ట్రపతి సి.పి. రాధాకృష్ణన్ కూడా గెలాక్సీ ఐ బృందాన్ని అభినందిస్తూ, ఇది భారతదేశం యొక్క పెరుగుతున్న ప్రైవేట్ అంతరిక్ష ఆవిష్కరణల శక్తికి నిదర్శనమని పేర్కొన్నారు.

'మిషన్ దృష్టి' ఉపగ్రహం పగలు, రాత్రి అనే తేడా లేకుండా, ఎటువంటి కఠిన వాతావరణ పరిస్థితుల్లోనైనా భూమిని నిశితంగా పరిశీలించగల (Earth Observation) అధునాతన సామర్థ్యాన్ని కలిగి ఉంది. ఈ సాంకేతికత భారతదేశ వాణిజ్య అంతరిక్ష ఎకోసిస్టమ్‌ను మరింత బలోపేతం చేస్తుందని ప్రధాని మరియు ఉపరాష్ట్రపతి ఆశాభావం వ్యక్తం చేశారు. 'మేక్ ఇన్ ఇండియా' మరియు 'ఆత్మనిర్భర్ భారత్' స్ఫూర్తితో ప్రైవేట్ రంగం సాధించిన ఈ విజయం అంతర్జాతీయ స్థాయిలో దేశ ప్రతిష్టను మరో మెట్టు ఎక్కించిందని వారు ప్రశంసించారు.