80% మంది నేతలు పోర్న్ చూస్తారు : పప్పూ యాదవ్ మరోసారి వివాదాస్పద కామెంట్స్
బీహార్ ఎంపీ రాజేష్ రంజన్ అలియాస్ పప్పూ యాదవ్ మరోసారి వివాదాస్పద వ్యాఖ్యలు చేసారు.
దిశ, వెబ్ డెస్క్ : బీహార్ ఎంపీ రాజేష్ రంజన్ అలియాస్ పప్పూ యాదవ్ మరోసారి వివాదాస్పద వ్యాఖ్యలు చేసారు. మహిళా రిజర్వేషన్ బిల్లుపై చర్చ జరుగుతున్న తరుణంలో ఆయన చేసిన వ్యాఖ్యలు ఇప్పుడు దేశవ్యాప్తంగా చర్చనీయాంశమయ్యాయి. "70-80 శాతం మంది రాజకీయ నాయకులు పోర్న్ చూస్తారు" అని ఆయన బహిరంగంగా వ్యాఖ్యానించడం పెద్ద దుమారానికి దారితీసింది. అంతటితో ఆగకుండా, "అందరి ఫోన్లను తనిఖీ చేయండి, కావాలంటే నా ఫోన్లో కూడా తనిఖీ చేయవచ్చు" అని ఆయన సవాల్ విసిరారు. ఈ వ్యాఖ్యలు నేరుగా లోక్సభలోనే చేసినట్లు ఆయన పేర్కొనడం గమనార్హం.
ఈ వ్యాఖ్యలపై బీహార్ రాష్ట్ర మహిళా కమిషన్ తీవ్రంగా పరిగణించి, ఆయనకు నోటీసులు జారీ చేసింది. గతంలో కూడా "మహిళలు రాజకీయాల్లో రాణించాలంటే పురుష నాయకుల గదుల చుట్టూ తిరగాల్సి వస్తోంది" అని ఆయన చేసిన వ్యాఖ్యలు పెద్ద ఎత్తున విమర్శలకు గురయ్యాయి. ఇప్పుడు మరోసారి అశ్లీలత అంశాన్ని ప్రస్తావిస్తూ ప్రజాప్రతినిధుల నైతికతను ప్రశ్నించడంపై మహిళా సంఘాలు, బీజేపీ మండిపడుతున్నాయి. ప్రజాస్వామ్య దేవాలయం వంటి పార్లమెంట్లో ఇలాంటి భాషను ఉపయోగించడం గౌరవప్రదం కాదని పలువురు అభిప్రాయపడుతున్నారు.
అయితే పప్పూ యాదవ్ మాత్రం తన వ్యాఖ్యలకు కట్టుబడి ఉన్నట్లు కనిపిస్తోంది. "నేను వాస్తవాలే మాట్లాడాను, గాజు ఇళ్లలో ఉండేవారు ఇతరులపై రాళ్లు వేయకూడదు" అంటూ తనను విమర్శించే వారికి ఘాటుగా సమాధానమిచ్చారు. లోక్సభ రికార్డుల్లో తన మాటలు ఉన్నాయని, దేనికైనా సిద్ధమని ఆయన పేర్కొంటున్నారు. అయితే పప్పూ వ్యాఖ్యలపై సోషల్ మీడియాలో మిశ్రమ స్పందనలు వస్తున్నాయి. కొందరు ఆయన ధైర్యాన్ని మెచ్చుకుంటుంటే, మరికొందరు ఒక ఎంపీ స్థాయిలో ఉండి ఇలాంటి దిగజారుడు వ్యాఖ్యలు చేయడం సిగ్గుచేటని వ్యాఖ్యానిస్తున్నారు.
