రోడ్డు పక్కన గోనె సంచి మూట.. విప్పి చూసి షాక్ అయిన స్థానికులు

దిశ, వెబ్ డెస్క్ : రోడ్డు పక్కన రెండు రోజులుగా ఓ గోనె సంచి పడి ఉంది. అనుమానంతో దానిని ఓపెన్ చేసి చూసిన స్థానికులు అందులో ఓ మహిళ శవం ఉండటంతో షాక్ అయ్యారు. చెన్నై పల్లావరం సమీపంలోని త్రిశూలం ముక్కని అమ్మన్‌ ఆలయ వీధిలో రోడ్డు పక్కన పడి ఉన్న ఒక బస్తా నుండి తీవ్రమైన దుర్వాసన వస్తుండటాన్ని గమనించిన స్థానికులు పోలీసులకు సమాచారం అందించారు. ఘటనా స్థలానికి చేరుకున్న పల్లావరం పోలీసులు, స్థానికుల సహాయంతో ఆ బస్తాను తెరిచి చూడగా, అందులో ఒక వృద్ధురాలి మృతదేహం లభ్యమైంది. పోలీసులు వెంటనే ఆ మృతదేహాన్ని స్వాధీనం చేసుకుని పోస్టుమార్టం నిమిత్తం ప్రభుత్వ ఆసుపత్రికి తరలించారు.

పోలీసుల ప్రాథమిక దర్యాప్తులో మృతురాలు అదే ప్రాంతానికి చెందిన 75 ఏళ్ల భాగ్యలక్ష్మిగా గుర్తించారు. ఆమె భర్త 15 ఏళ్ల క్రితమే మరణించగా, ఆమెకు 10 మంది పిల్లలు ఉన్నప్పటికీ ఎవరూ ఆమెను పట్టించుకోకపోవడంతో ఒంటరిగా ఉంటోంది. స్థానికంగా పువ్వులు అమ్ముకుంటూ జీవనం సాగిస్తున్న భాగ్యలక్ష్మి.. త్రిశూలం ప్రాంతంలోని ఒక హోటల్‌లో పనిచేస్తున్న మహమ్మద్‌ ఆసన్‌ అనే 63 ఏళ్ల వ్యక్తితో కలిసి జీవిస్తోంది. వృద్ధురాలి మృతదేహం అనుమానాస్పద స్థితిలో బస్తాలో దొరకడంతో పోలీసులు మహమ్మద్‌ ఆసన్‌ను అదుపులోకి తీసుకుని విచారించారు.

పోలీసుల విచారణలో ఆసన్ అసలు విషయం వెల్లడించాడు. వంట గ్యాస్‌ కొరత కారణంగా తాను పనిచేస్తున్న హోటల్‌ను మూసివేశారని, అదే సమయంలో భాగ్యలక్ష్మి అనారోగ్యంతో మరణించిందని తెలిపాడు. అయితే, ఆమె అంత్యక్రియలు నిర్వహించడానికి తన వద్ద డబ్బులు లేకపోవడంతో ఏం చేయాలో తోచక మృతదేహాన్ని బస్తాలో కట్టి రోడ్డు పక్కన పడేసినట్లు ఒప్పుకున్నాడు. అలా రోడ్డు పక్కన పడేస్తే సామాజిక కార్యకర్తలు ఎవరైనా చూసి అనాథ శవంగా భావించి ఖననం చేస్తారని తాను ఈ పని చేసినట్లు నిందితుడు పేర్కొన్నాడు. ఈ ఘటనపై పోలీసులు కేసు నమోదు చేసుకుని దర్యాప్తు జరుపుతున్నారు.