"నో నీట్" ప్రొటెస్ట్.. హాజరైన తమిళ స్టార్స్

దిశ, వెబ్ డెస్క్ : నీట్ (NEET) పేపర్ లీకేజీ వ్యవహారంపై విద్యార్థులు, నిరుద్యోగ యువత చేపడుతున్న ఆందోళనలు దేశాన్ని కుదిపేస్తుండగా.. తమిళనాడు మాత్రం ఏకంగా నీట్ పరీక్షను ఎత్తేయాలని కేంద్రాన్ని డిమాండ్ చేస్తోంది. ఈ నేపథ్యంలో శుక్రవారం చెన్నైలో చేపట్టిన "నో నీట్" ప్రొటెస్ట్ కు తమిళ చిత్ర పరిశ్రమ నుంచి అనూహ్య రీతిలో అపూర్వ మద్దతు లభించింది. విద్యావ్యవస్థలో జవాబుదారీతనం లోపించిందని, విద్యార్థుల భవిష్యత్తుతో ఆడుకోవడం తగదని నిరసిస్తూ ప్రారంభమైన ఈ పోరాటం, తమిళ సినీ రంగానికి చెందిన అగ్ర నటులు, విప్లవాత్మక దర్శకులు, కళాకారులు కలసికట్టుగా రంగంలోకి దిగడంతో సరికొత్త చైతన్యాన్ని సంతరించుకుంది. విద్యార్థుల నిరసన గళానికి తమ గొంతును కూడా తోడు చేసి, కేంద్ర ప్రభుత్వం నీట్ పరీక్షను పూర్తిగా రద్దు చేయాలని గట్టిగా డిమాండ్ చేసారు. నటుడు, మక్కల్ నీది మయ్యమ్ అధినేత కమల్ హాసన్, దర్శకులు పా. రంజిత్, వెట్రిమారన్, అమీర్‌లు చెన్నై వేదికగా విద్యార్థులతో కలిసి భారీ ఆందోళనలు, ధర్నాలు నిర్వహించి నిరసన సెగను మరింత రాజేశారు. అంతేకాకుండా, తన విప్లవాత్మక గీతాలతో యువతలో విశేష ప్రజాదరణ పొందిన ప్రసిద్ధ ర్యాపర్ 'తెరుక్కురళ్' అరివు స్వయంగా వీధుల్లోకి తన గళం విప్పారు. చెన్నై సచివాలయం ఎదుట జరిగిన ప్రొటెస్ట్‌లో నేరుగా పాల్గొని విద్యార్థుల హక్కుల కోసం నినదించారు. ఈ ఉద్యమానికి మద్దతుగా భారీగా ప్రజలు కూడా తోడవడంతో రాష్ట్రం అంతా నో నీట్ అంటూ నినాదాలతో దద్దరిల్లింది.