హోంమంత్రి అనిత 'X' అకౌంట్ హ్యాక్

దిశ, వెబ్ డెస్క్ : ఆంధ్రప్రదేశ్ హోమ్ మంత్రి వంగలపూడి అనిత అధికారిక X (ట్విట్టర్) ఖాతా హ్యాకర్స్ బారిన పడింది. ఈ శుక్రవారం ఆమె ఖాతాను హ్యాక్ చేసిన దుండగులు, దానిని దుర్వినియోగం చేస్తూ కొన్ని అనుమానాస్పద పోస్టులు పెట్టారు. అకౌంట్ లో FXRP పేరుతో క్రిప్టోకరెన్సీకి సంబంధించిన ఒక స్కామ్ లింక్‌ను పిన్ చేయడంతో ఈ విషయం వెలుగులోకి వచ్చింది. అలాగే అకౌంటులోని పోస్టులు, డీపీ ఏవీ కనబడటం లేదు. కాగా తన సోషల్ మీడియా ఖాతా హ్యాకింగ్‌కు గురైందని గుర్తించిన హోమ్ మంత్రి వంగలపూడి అనిత తక్షణమే స్పందించారు. ఈ ఘటనపై విచారణ జరిపి హ్యాకర్లను పట్టుకోవాలని కోరుతూ ఆమె అనకాపల్లి పోలీసులకు ఫిర్యాదు చేశారు. పోలీసులు కేసు నమోదు చేసుకుని, ఆ ఖాతాను తిరిగి స్వాధీనం చేసుకోవడానికి, సైబర్ నేరగాళ్లను గుర్తించేందుకు సైబర్ క్రైమ్ విభాగంతో కలిసి చర్యలు చేపట్టారు.