తిరిగి శ్రీమందిరానికి పయనమైన పూరీ జగన్నాథుడు

దిశ, వెబ్ డెస్క్ : ఒడిశాలోని పవిత్ర పూరీ శ్రీక్షేత్రంలో జరుగుతున్న జగన్నాథ రథయాత్ర మహోత్సవంలో మరో కీలకమైన ఘట్టం ఆవిష్కృతమైంది. గుండిచా ఆలయంలో వారం రోజుల పాటు భక్తులకు దర్శనమిచ్చిన జగన్నాథ స్వామి, ఆయన సోదరి సుభద్రా దేవి, సోదరుడు బలభద్రుడు తమ నిజ నివాసమైన శ్రీమందిరానికి తిరిగి పయనం కావడం ప్రారంభమైంది. ఈ రథయాత్రలో గుండిచా ఆలయం నుంచి తిరిగి శ్రీమందిరానికి వచ్చే ఈ తిరుగు ప్రయాణాన్నే 'బహుడా యాత్ర' అని పిలుస్తారు. గుండిచా ఆలయంలో పూజాదికాలు ముగిసిన అనంతరం, దేవతలను మళ్లీ ప్రత్యేక 'పహండి' (Pahandi) వేడుక ద్వారా దైతాపటి సేవకులు భుజాలపై మోస్తూ బయటకు తీసుకువచ్చి రథాలపై అధిష్టింపజేశారు. జగన్నాథ స్వామి 'నందిఘోష' రథంపై, బలభద్రుడు 'తలధ్వజ' రథంపై, సుభద్రా దేవి 'దేవదలన' రథంపై ఆసీనులయ్యారు. రథాల వద్దకు చేరిన దేవతలకు ఆలయ సేవకులు, పూజారులు ప్రత్యేక ధూప దీప నైవేద్యాలు సమర్పించారు.

దేవతలు రథాలపైకి చేరిన తర్వాత, పూరీ గజపతి మహారాజు సాంప్రదాయబద్ధంగా బంగారు చీపురుతో రథాల ప్రాంగణాన్ని ఊడ్చి నమస్కరించే పవిత్ర 'ఛేరా పహరా' (Chera Pahara) క్రతువును నిర్వహించారు. ఛేరా పహరా పూర్తయిన వెంటనే లక్షలాది మంది భక్తులు జయజయధ్వానాలు, 'జై జగన్నాథ్' నామస్మరణలు చేస్తూ రథాల తాడులను లాగడం ప్రారంభించారు. ఈ మార్గమధ్యంలో 'మౌసీ మా' (లక్ష్మీదేవి అత్తగారి) ఆలయం వద్ద రథాలు ఆగి, స్వామివారికి ఎంతో ప్రీతిపాత్రమైన 'పోడా పిఠా' (Poda Pitha) అనే ప్రత్యేక పిండివంటను నైవేద్యంగా స్వీకరిస్తారు. రథాలు శ్రీమందిరం వద్దకు చేరుకున్న తర్వాత 'సునాబేష' (బంగారు అలంకారం) కార్యక్రమం, చివరగా ఆలయ ప్రవేశం చేసే 'నీలాద్రి విజే' ఘట్టాలతో ఈ వార్షిక రథయాత్ర ఉత్సవాలు సంపూర్ణమవుతాయి.