మోడీ వీడియో.. వరల్డ్ రికార్డులు బద్దలు

దిశ, వెబ్ డెస్క్ : సామాజిక మాధ్యమాల్లో ప్రధాని నరేంద్ర మోడీకి ఉన్న క్రేజ్ గురించి ప్రత్యేకంగా చెప్పాల్సిన అవసరం లేదు. తాజాగా ఆయన విడుదల చేసిన ఒక సెల్ఫీ వీడియో డిజిటల్ ప్రపంచంలో సరికొత్త చరిత్ర సృష్టించింది. దేశవ్యాప్తంగా తీవ్ర సంచలనం సృష్టించిన నీట్ (NEET) పేపర్ లీకేజి వ్యవహారంపై స్పందిస్తూ, ఈ కుంభకోణంలో ఎంతటి వారున్నా వదిలిపెట్టబోమని, నిందితులపై అత్యంత కఠినమైన చర్యలు తీసుకుంటామని హామీ ఇస్తూ ప్రధాని మోడీ గురువారం అర్థరాత్రి ఒక సెల్ఫీ వీడియోను తన సోషల్ మీడియా ఖాతాల్లో పోస్టు చేసారు. శుక్రవారం అంతా నెటిజన్లు, విద్యార్థులు ఈ వీడియోను విపరీతంగా షేర్ చేయడంతో అన్ని సామాజిక మాధ్యమ వేదికల్లో ఇది అత్యంత వేగంగా వైరల్‌గా మారింది. కేవలం 24 గంటల వ్యవధిలోనే ఈ వీడియో ఏకంగా 303 మిలియన్ల వ్యూస్ సొంతం చేసుకుని, ప్రపంచంలోనే అత్యధిక వ్యూస్ పొందిన వీడియోలలో ఒకటిగా నిలిచి ఆల్-టైమ్ వరల్డ్ రికార్డును బద్దలు కొట్టింది.

ఈ ప్రక్రియలో ప్రధాని మోడీ వీడియో గ్లోబల్ డిజిటల్ క్రియేటర్ల రికార్డులను కూడా తిరగరాసింది. ఇటీవల ఫిఫా వరల్డ్ కప్ (FIFA World Cup) సమయంలో ప్రపంచ ప్రసిద్ధ కంటెంట్ క్రియేటర్ IShowSpeed చేసిన ఒక వీడియో 300 మిలియన్ వ్యూస్ సాధించి నెలకొల్పిన రికార్డును మోడీ వీడియో అధిగమించింది. స్పీడ్ రికార్డు కంటే మరో మూడు మిలియన్ల వ్యూస్ ఎక్కువగా సాధించి అంతర్జాతీయ స్థాయిలో సరికొత్త మైలురాయిని పిఎం మోడీ సొంతం చేసుకున్నారు. శనివారం ఉదయానికి ఈ వీక్షణల సంఖ్య మరింత పెరిగి ఏకంగా 321 మిలియన్లకు చేరుకోవడం విశేషం. ఈ అపూర్వమైన స్పందనతో ఇన్స్టాగ్రామ్‌లో పిఎం మోడీ క్రేజ్ మరింత పుంజుకుంది. ఒక్క రోజులోనే ఆయన ఇన్స్టాగ్రామ్ ఖాతాకు దాదాపు 10 లక్షల మంది కొత్త ఫాలోవర్లు తోడయ్యారు, దీంతో ఆయన మొత్తం ఫాలోవర్ల సంఖ్య 102 మిలియన్ల భారీ మార్కును దాటిపోయింది. తన వీడియోకు లభించిన ఈ ఊహించని స్పందనకు, మద్దతుకు కృతజ్ఞతలు తెలుపుతూ శుక్రవారం అర్థరాత్రి "థాంక్యూ ఫ్రెండ్స్" అంటూ ప్రధాని మోడీ మరో వీడియోను కూడా విడుదల చేశారు.