చేపలు ఎక్కడికి వెళతాయి? : మౌమితా ఆలం ఎలిజీలు

చేపలు ఎక్కడికి వెళతాయి?

~~~

మాకు చాలా కావాలి!

అవును చాలా అధికంగా కావాలి!

భయంకరమైన రీతిలో మాకు కావాల్సిందే!

అంతులేకుండా,అనంతంగా మాకు కావాలి!

**

తన జాతిలో చిట్ట చివరి చేపలు పట్టేవాడైన బిష్ణు,

తన స్వప్నాల్లో నీటి కొలనులను చూస్తాడు!

ప్రతీ రోజు రాత్రి ఆకాశమంత ఎత్తుకు లేచిన అపార్టుమెంట్ల దగ్గరికి వెళ్ళి వాటిని నోరారా శపిస్తాడు!

**

కిందికి వంగి భూమికి చెవులునానించి ,

అతను బిల్డింగ్ కింద రసాయనాలు ఎక్కువై నేలలో చిక్కుకు పోయిన చేపలు చేసే సడిని నిస్సహాయంగా వింటాడు!

**

పిల్లర్లను తోసేస్తూ బిల్డింగ్ లను కదల్చాలని చూస్తాడు ఆ చేపలు పట్టేవాడు!

ఎంతగా అంటే,ఊపిరి ఆగిపోయేంతగా, అతని చేతుల నుంచి రక్తాలు కారెంతగా అన్నమాట!

*

ఉదయాన్నే దారిన వెళ్ళే బాటసారి,చేపలు పట్టేవాడు మరణించి ఉండడాన్ని చూస్తాడు!

ఆ వెర్రి చేపలు పట్టేవాడికోసం ఎవరూ ఏడవరు!

ఏడవాలంటే., చనిపోయినవాడు బాగా ధనవంతుడై ఉండాలి!

బిష్ణు డబ్బున్నవాడేమి కాడు మరి!

ఎవరేడుస్తారని చేపల కోసం, కొలను కలలు కన్న ఆ నిర్భాగ్యుడి కోసం?

కేవలం అతని పిడికిట్లో మిగిలి ఉన్న ఇసుక తప్ప?

-ఇంగ్లీష్ మూలం మౌమితా ఆలం

తెలుగు అనువాదం గీతాంజలి